Vawiin khan Mizoram University Campus, Tanhrila hmuna sak zawh thar, rampuma a hmasa ber leh awmchhun ‘Centre for Disability Studies’ chu Mizoram Chief Minister Pu Lal Thanhawla’n a hawng a. Mizoram rawn tlawhtu Union Minister of State, Social Justice & Empowerment Pu Krishanpal Gurjar uapna hnuaiah he hun hi hman a ni a; Ministry of Social Justice & Empowerment-a Joint Secretary Pi Dolly Chakravarty leh Mizoram sorkara Social Welfare Secretary Pi Vanlalrawni bakah Ministry leh Mizoram Sorkar officials leh Department of Social Work, MZU hotute te pawh an tel.

Khuallian Mizoram Chief Minister Pu Lal Thanhawla chuan National Institute for Locomotor Disabilities (Divyangjan), Kolkata leh Department of Social Work, MZU te thahnemngaihna avangin rampuma rualbanlote harsatna hrang hrang zirchianna hmun ‘Centre for Disablitiy Studies’ hmasa ber tur chu Mizoram University Campus chhungah ngeiah hawn a ni thei ta chu a lawmawm takzet a ni, a ti a. He Centre hawn thar tak chuan rampumah Mizoram chu hming thatna leh mithiamte hriat a hlawh tir ngei a beisei thu a sawi bawk. Mizoram ang tlangramah chuan rualbanlote tan an nitin chetvel leh khawsakah harsatna a tam lehzual thin a, hei hi sorkar pawhin hriatpuiin theihtawp a chhuahsak mek a ni, a ti. Sorkar laipui chuan rualbanlote tan ‘common identification card’ siam sak a tum thu sawiin Chief Minsiter chuan hei hian an zirna lamah te, hriselna enkawlna lamah te leh ram inrelbawlnaa an inhmanna tur (political participation)-ah pawh a tangkai ngei ang, a ti bawk. Social Justice & Empowerment Minister atan Dan lam thiam tak mi kan nei hi rampuma rualbanlote tan nihlawhna leh kwng tam taka an tan vanneihna a ni tih sawiin Pu Lal Thanhawla chuan lawm takin he Centre thar hi a hawn thu leh hemi hmuna research ti tura lo kal tur zawng zawngte duhsakna a hlan a; vawiin veka neih tur ‘Seminar on Disabiltiy : Developing Human Resources & Removing Barriers’-a tel tur zawng zawngte pawh duhsakna a hlan a ni.

Union Minister of State, Social Justice & Empowerment Pu Krishanpal Gurjar pawhin thu sawiin sorkar laipui aiawhin Mizoram University hnuaiah Disability Studies Centre thar hawn tak chu duhsakna a hlan a. Pianphunga rualbanloten harsatna an tawh thin hrang hrang chu zirchian zel a nih theih nan leh an harsatnate sutkian dan pawh ruahman sak a, hengte hian an nitin khawsak a tiawlsam zual deuh deuh theih nan chak zawka hmalak a ni zel ang, a ti a. Union Minister Gurjar chuan rualbanloten mahni inrintawkna an neih a pawimawh a, an eizawnna kawng engah pawh chhawrtlaka thiamna an neih a pawimawh bawk a ni, a ti. Mi pangngaite ang bawka rualbanlote pawhin hringnun nuam leh hlim tak an hman theihna tura hmalak hi anmahni leh anmahni buaipuitute chauh ni lovin khawtlanga mitinte mawhphurhna a ni nghe nghe tiin Pu Gurjar chuan vawiina Centre hawnna inkhawma kalkhawmte chu a fuih a ni.

Vawiina Centre for Disability Studies hawnna inkhawmah hian Ministry of Social Justice & Empowerment-a Joint Secretary Pi Dolly Chakravarty leh MZU Vice Chancellor Prof. Simbasiva Rao te pawhin thu an sawi a. He Centre hi Ministry of Social Justice & Empowerement hnuaia Department of Persons with Disabilities-in a sakna tur sum a bultum sak a, kum 2012 khan MoU ziak tawh niin kum 2015 atanga khan Centre sakna hna tan a ni a, kumin June thla khan sak zawhfel a ni ta a ni.

Mizorama zan khat riaka lo zin Union Minister of State, Social Justice & Empowerment Pu Krishanpal Gurjar chu MZU-a Centre hawnna inkhawm a hman zawhah Delhi lam panin a thlawk haw nghal a ni.