Pu Lal Thanhawla, Chief Minister leh Chairman State Level Committee on Fire Prevention nibawk chuan vawiin khan I & PR Auditorium-ah Fire Prevention Week (19-24 January) 2015 a hawng. Hawnna inkhawmah hian Pu R. Romawia, Higher & Technical Education Minister; Pu H. Rohluna, School Education Minister; Pu R. Lalrinawma, Dy. Speaker leh Pu Hmingdailova Khiangte, Parliamentary Secretary te an tel a, Pu Lalrinmawia Ralte, Environment & Forest Minister chu hawnna inkhawmah hian chairman a ni.

Chief Minister chuan ram kang veng tur hian Forest Department leh YMA kutah chauh dah lovin kan zavaia kan tanrual a ngai a, khawtlanga pheikhai rual taka ke pen ho na chi a ni tiin, lo leh huan neitute lo hal kawngah zirtirna kan pek that loh chuan ram kang venna kawngah hma kan sawn tak tak thei lovang a ti. Pu Lal Thanhawla chuan MLA zawng zawng mahni bial theuha V/C te kangmei ven kawnga ti ti pui turin a sawm. Ram ti kang lo tur leh ramkang thelh tur hian neitu nihna rilru put loh chuan thahnemngaih a har hle a. Ramngaw humhalh tur chuan ram neitu kan nihnaa kan chian leh ram tih kan pawizia kan hriat a tul a ni. Ram kang a lo awm pawhin thelh turin i in ring theuh ang u, a ti bawk.

Pu Lal Thanhawla chuan vawiina Fire Prevention Week hawnnaa lokalte hian kan thil hriatte hi a zau thei ang bera kan thehdarh a tul a ni, a ti a. Kan ram hi India hmarchhak state ah ram ti kang nasa ber kan ni a, Forest survey in a report danin kumtin 980 Sq Km kan ti kang thin a ni tiin ram kan tih kan hi kan in thlahdah vang a ni em tih hi kan ngaihtuah a ngai a ni a ti. Lo kan hal dawnin mei kawng sial hmasa lovin ram hi kan hal fo thin a, hemi avang hian ram kan ti kang nasa hle a ni a ti. Tun atanga kan ram humhalh nachang kan hriat loh chuan kan tu leh fa te tan ram hrehawm tak kan hnutchhiah a hlauhawm a ni, a ti.

Pu Lalrinmawia Ralte, Environment & Forest Minister leh Co-Chairman, State Level Committee on Fire Prevention chuan ram kang avang hian hun leh tha leh sum tam tak senga road side plantation/reserve siamte hi a tih chereu mai bakah kan nungchate kan chan nasa hle a ni a ti a. Ramhnuaia ram kal ten mamawh avanga mei kan chhem kan tih hlum that loh thin vang te leh meizial bung kan thlahdah vangte in ram hi a lo kang thin a, chuvangin i fimkhur tlang ang u a ti bawk.

Pu Lalram Thanga IFS, PCCF & Member Secretary, State Level Committee on Fire Prevention chuan report pe in Fire Prevention Week hi kum 2000 atang khan Mizoramah hman tan anih tawh thu sawiin kumin atang hian 19 - 24, January chhung hman a ni dawn a, week hman hma nachhan chu nasa lehzuala inzirtirna hun hman anih theih nan buatsaih a ni, a ti.

Lo hi 15 March, 2015 ral hma ngei a hal hman vek tura tih a ni.

Kangmei venna kawnga ti thate hnenah lawmman siam a ni leh dawn a. District Levelah chuan 1 na Rs. 50,000/- leh citation; 2 na Rs. 30,000/- leh citation leh 3 na Rs. 20,000/- leh citation a ni ang a. Village Level ah lawmman 5 siam a ni a. 1 na Rs. 50,000/- leh citation; 2 na Rs. 30,000/- leh citation; 3 na Rs. 20,000/- leh citation; 4 na Rs. 15,000/- leh citation leh 5 na Rs. 10,000/- leh citation a ni bawk ang.