March ni 14, 2014-a tan tawh HPC CUP 2014 chu vawiin khan Thuamluaia Mual, Lunglei-ah Final Match khelh a ni a, kharna hun hi Chief Minister leh Lunglei High Powered Committee Chairman ni bawk Pu Lal Thanhawla'n Khuallian chan changin a hmanpui a ni.

HPC CUP 2014 kharna inkhawmah HPC Vice-Chairman Pu S.Laldingliana kaihhruaiah Khuallian Pu Lal Thanhawla chuan sorkarin Mizo thalaite tan khawvel thar siam sak a tum chu hlen zelin, Sports Minister Pu Zodintluanga hmalakna chak tak avang pawhin infiamna lamah Mizoram chu a thangduang hle a ni, a ti a. Mizo infiammite chu thawhrimna leh mahni inthununna an neih that viau chuan tun ai pawhin an thlen san thei a rin thu a sawi a. Sports leh kawng dawnga Mizo ram leh hnam tana thawk tha leh tihmingthatu nih hi thalaite tih tur dik tak a ni, a ti bawk. Sorkarin theihtawp chhuah zelin Mizo thalaite tan inkhelna hmun tha leh Stadium puilting a sa chho zel a, infiammite pawhin hma an sawn nasat mai bakah sports avanga thalai hausa tak tak kan nei mek a, hei hi a lawmawm tak zet a ni, a ti.

HPC Vice-Chairman Pu S.Laldingliana pawhin HPC CUP 2014 kharna inkhawm a hmanpui thei avangin Chief Minister Pu Lal Thanhawla chungah lawmthu a sawi a. Chief Minister hi Lunglei-a a lo zin apiangin Lunglei khua leh mipuite tan thil chhenfakawm tak tak a pek thin thu sawiin tun tumah pawh Chief Minister chuan Lunglei Sobji Bazar sak thatna tur sum mamawh chu sorkarin a ngaihtuahsak a tum thu Vice-Chairman hian a tarlang a ni.

HPC Cup 2014 Final hmanpui tur lo kal Mizoram Football Association Hony. Secretary Pu Lalnghinglova Hmar pawhin thu sawiin kumin hi MFA tan kum tha a ni a; FIFA Grassroots Development Programme-ah Best State nihna kan hauh a, National Junior Football-ah Champion kan nih mai bakah National Senior Level Santosh Trophy-ah pawh Champion kan ni hi a lawmawm hle a ni, a ti a. MFA hmachhawp hrang hrang tarlangin Pu Lalnghinglova chuan kumin MFA Cup chu Champhai-ah nghah a nih tur thu leh May thlaah Germany atangin Football Club-in Mizoram an rawn tlawh tum thu a sawi bawk a ni.

Vawiin HPC Cup 2014 kharna inkhawmah hian Chief Minister bakah a nupui Pi Lal Riliani; Lunglei West bialtu MLA Pu Chalrosanga Ralte; Lunglei District Officials; MFA leh LDFA hruaituten an tawiawm a ni.

Vawiin HPC 2014 Final Match khelhah Electric Veng VC Football Team te chuan 2-0 in Ramthar VC Team te hnehin an Champion ta a, kumin atang hian Trophy hi Champion Team ten an kawl hlen tawh dawn a ni. Champion Team Electric Veng-te hi Khuallian Chief Minister Pu Lal Thanhawla'n Trophy leh lawmman sumfai a hlan a; Lunglei District Basketball Association hnenah Digital Scoreboard a hlan bawk a ni. Pi Lal Riliani'n Final khel Team pahnihte chu football jersey set a hlan ve ve bawk a ni.