Nimin ni 6 November 2015 khan Mizoram Chief Minister leh Chairman, Lunglei High Powered Committee ni bawk Pu Lal Thanhawla chuan Lunglei khawpui hming phut chhan ‘Lung-Lei’ leh Nghasih zau Electrification a hawng. He hunah hian Lunglei HPC Vice-Chairman Pu S.Laldingliana, Horticulture Minister Pu PC Lalthanliana, ZENICS Chairman Pu Chalrosanga Ralte bakah HPC Member-te leh Lunglei District officials hrang hrangten Chief Minister leh a nupui Pi Lal Riliani an tawiawm a ni.

‘Lung-Lei’ leh Nghasih zau Electrification hawnna inkhawm HPC Vice-Chairman Pu S.Laldingliana kaihhruaiah Khuallian Pu Lal Thanhawla chuan hnam fing apiangin pipute sulhnu hlut leh humhalh nachang an hria a; Mizote hemi kawngah harhchhuak tlai deuh mahse tunah chuan hnam leh ram rohlu a nihzia hre tharin vawiinah pawh Lunglei khawpui hming putchhan khuanu duan sa ‘Lung-Lei’ hmun mawi tak chei tha a, mipui leh khualzinte tlawh theia hawn a ni thei ta chu a lawmawm hle a ni, a ti a. Eng ram mah hi kuthhnathawktute tel lovin a intungding zo ngai lo a ni tih sawiin Pu Lal Thanhawla chuan sorkarin kuthnathawktute hmasawnna leh hamthatna tur ngaihtuahin kawng tha leh kawlphetha lamah tan a la zel a, chumi rah chu vawiina Nghasih zaua loneitu chhungkhua 32 ten a takin an chhawr thei dawn ta chu a lawmawm takzet a ni, a ti bawk. Nghasihzau electrification atana ram mamawh chu mimal ten ui lo leh compensation phut miah lova an ram an pek chu a fakawmin a entawntlak zet a ni, a ti bawk. Ram chu Pathian ta a nih avangin Mizo Kristiante chuan mahni mihringpuite bakah ramchhunga thing leh mau, nungcha leh thilnungte thleng phak chanchintha kan nunpui tur a ni a, a tichereu zawng ni lovin, heng kan ram hausakna leh timawitute hi humhalhin duat taka enkawl tur kan ni, a ti. Ei leh barah kan intodelh loh chuan hnamdangte hnenah chanchintha hril ngam tur kan ni lo tiin Chief Minister chuan ram leh hnam dangte hmuh phaka Mizoram tihhmasawn nan hian rinawmna, taimakna leh Pathian tihna chiah kan mamawh a ni, a ti. Ram leh hnam hian hmathlir thiam mite a mamawh a, Lunglei District-in MLA 7 fel leh hmathlir nei tha a neih hi District mipuite an vanneih hlea a hriat thu a sawi bawk.

‘LUNG-LEI’ chanchin : Lunglei Cultural Society Report tarlan danin Lunglei khaw hming phut chhan hi lung indawh (stone bridge) ‘LUNG-LEI’ hi tehkualin 24’ leh a chanve a ni a, a vang lam hi 18’x7’ vel a ni a, a hnuai Sipai Lui atanga a san zawng hi 28’ vel a ni. Vailen vawi 2-na kum 1888-1890 khan Col. Tregear ho khan chhimlam an rawn tuam a, Mizo Lalten nasa taka lo dodal mahse an dodal zo lo a. Co. Tregear (pu Trucker) chuan Sailo Lalte hnenah ram lo luahtu an nih angin palai atan CS Murray tirin inbenbel a dil a, phalsak an nih angin tuna Saikuti Hall, Lunglei phei PWD Office awmnaah hian thingin kulh an sa a. Chu chu helai Lung-Lei hming chawi hian ‘Fort Lung-Leh’ ti a ni a, chu chu tun hnuah officiala a hming ‘Lunglei’ tia awm tanna a ni.

Kum 1989-1990 ah khati laia Chief Minister ni tho tuna Chief Minsiter Pu Lal Thanhawla chuan Lunglei Bawrhsap Pu RL Thanzawna kaltlangin Rs.20,000/- pein Bazar veng YMA ten chawlhbuk an sa a. Kum 2004-2005 khan Lunglei Cultural Society ten Rs.50,000/- hmangin Lungphun an siam a, chu chu khati laia Bawrhsap Pi M.Zohmingthangi’n a hawng a. Kum 2014-ah Lunglei HPC Vice-Chairman Pu S.Laldingliana hmalaknain cheng nuai 19.50 sengin chei tan leh a ni a, kum 2015-ah cheng nuai 13.5 dah lehin, chawlhbuk hnuai lung indawh ‘Lung-Lei’ lan chian theih nan lei dawh nan te, motor parking leh kalkawng atana hman a ni a. He hmunah hian a chhehvel ramngaw humhalh leh siamthat te, ram hung that, tui chenna ‘Ranga Li’ chei that, tracking route siam, watch tower leh Mizo khua siam te chu hmathlirah neih a ni bawk.

Nghasih zau Electrification chungchanga SE, P&E Department Pu H.Zoliana Report kaihtawi : Nghasih zau hi Lunglei khawpui chhung atanga 8 kms. vel bawr a ni a, helai zau-ah hian chhungkua 32 velin huan loram neiin, eizawn nan an hmang mek a ni. Chhungkua 12 velin leilet neiin kumtin buh chingin kham khawp an thar thei a; a thenin thlai an ching bawk a, Lunglei khawpui chawmtu ber an ni. An buh leh thlai tharte lo pun pun lehzual nan mamawh hrang hrang an neih zingah kawlphetha hi a bulpui a ni tih hriain Lunglei HPC Vice-Chairman Pu S.Laldingliana hmalaknain nikum 2014 atang khan power supply pekdan tur ruahman tan a ni a. Sum indaihlohna avangin Phase I leh II-ah then niin, Phase-I hian Sunhlukawn thleng a huam a, 2km HT Line, 1km LT Line leh Transformer 63KVA, 11/0.4 KV te a huam a ni. LT Line hian Lunglei hming putchhan Lung-Lei hmun thleng pawh luh a ni bawk. Phase-I hi ni 18.5.2014-ah hna tan a ni a, ni 15.7.2014-ah zawh niin hemi ni chawhnu dar 2:00-ah hlawhtling takin test charge neih a ni. Phase-II hi Sunhlukawn atanga Nghasih zau hmun thleng niin, 2.5km HT Line, 1.5km LT Line leh 63KVA, 11/0.4 KV Transformer te siam/bun a ni a. Ni 18.6.2015 khan hna tan niin ni 23.9.2015 khan zawhfel a ni a, hemi ni vek dar 2:30 khan hlawhtling taka test charge nghal a ni.

Nghasih zau electrification atan hian Lunglei High Powered Committee chuan sum thawhin, a hna hi Power & Electricity Department-in a thawk a. Phase-I atan Rs.22,00,000/- leh Phase-II atan Rs.30,00,000/- sen ral niin Nghasih zau electrification atan hian avaiin Rs.52,00,000/- hman ral a ni. Nghasih zau electrification atan hian High Tension Line 4.5km, LT Line 2.5km leh D.T. Sub-Station hmun 2 ah siam leh bun a ni a; ram neituten compensation phut miah lovin an ramah sub-station bun, HT & LT Line ban phun leh Line kal an phalsak heng a hnuaia mite hnenah P&E Department chuan lawmthu a sawi a ni :

1).B.Lalkhuma, Salem; 2).Pi Lalbiakveli, Chanmari; 3).J.Thangchungnunga, Ramthar; 4).Lalengmawii, Chanmari; 5).B.Vanthanga, Chanmari; 6).Biakkungi, Chanmari; 7).Ngurthantluangi, Chanmari; 8).C.Biakthansanga, Ramthar; 9).C.Vanlalrema, Ramthar; 10).F.Lalrinawma, Ramthar; 11).Horticulture Department, 12).Village Council, Ramthar (Thlanmual); 13).Lalvuana Hnamte, Ramthar; 14).S.Laldingliana, Chanmari; 15).Pu Thangawma, Ramthar; 16).J.Thanghmingliana, Chanmari; 17).H.Lalrotluanga, Farm Veng leh 18).Lalhunpianga, Ramthar.