Mizoram Governor chuan a inleng, Professor rual te Raj Bhavan a a kawmna ah hmarchhak bial hmasawnna tur atan hmarchhak miten kawnghmang an hre ber zawk a a rinthu sawiin Delhi tlang atang hmalakna siam ringawt tawk lovin a hriat thu a sawi a.

Hmarchhak ah North East States te tana hmalakna thawk turin Office thuneihna sang tak nei dah nise a hlawkthlak hle in a rinawm thu a tarlang a. India in Act East Policy a kalpui mek pawh hi hmarchhak bial cheiawl hmasak a nih chuan a hlawhtling hma dawn a sawiin hmarchhak hualtu ram thenawm te nena inlaichinna tha zawk neih pawh thil tul hmasa a ni a ti. Tunah hi chuan North East state te hi ramri dep a Outpost ang mai ni in lang mahse, India hmalakna in South Asia ram hrang hrang te leh ASEAN ram intelkhawmte kalpawhna kawng a nih dawn bakah sumdawnna kawngpui a la ni ngei dawn a ni a ti. Professor kalkhawm te chu sawrkar tha a awm theih nan an thiamna leh ngaihtuahna te thawh nasa zual turin a ngen a. Hmarchhak bial chhunga state pakhat ah insawrbing case study kalpui a tangkai tur thu sawiin chu chuan hmarchhak state dang te tan pawh hmasawnna hna thawh nan tangkaina nasa tak a nei ang a ti. Professor te nen an inkawm zel na ah hmarchhak mite India ram hmun hrang hrang ah enhran an ni thin chu pawi a tih thu a sawi a. He thil ah hian mithiamte pawh in mipui zirtirna ah tihtheih an nei ngeia a rin thu a sawi a. Hnam hrang hrang nihphung, chindan leh ziarang te inzahsak tawnna lo chuan thil ho lam takah buaina liantham a chhuahphah thin a. North East mite rilru pawh inhawng zau zual se, Indian dang te pawh in Hmarchhak mite nunphung, sakhaw vawn leh nihphung te tun aia nasa in belhchian tum bawk se he thil lawm awm lo tak hi a reh mai a rin thu a sawi a ni.

Raj Bhavan ah hian Prof. Lianzela, Acting Vice Chancellor, MZU and Prof. Srinibas Pathi, Dean, School of Social Science, MZU ten mithiam rual hi an hova. An zingah hian Prof. AK. Sharma, Founder Vice-Chancellor, MZU, Prof. Mahendra P. Lama, Founder VC, Sikkim Central University (now Professor in JNU), Prof. Ashok Sharma, UGC-Emeritus Prof. in Pub. Admn., Jaipur University, Prof. Neelima Deshmukh, Director-CWSD & Head, Pub.Admn. Deptt., Nagpur University, Prof. Prabhat K. Datta, Former Centenary Chair in Pub. Admn., Kolkata University, Prof. Swinder Singh, Prof. in Pub. Admn., Punjab University, Prof. C. Hilda Devi, Professor, Deptt. of Sociology, Mother Teresa University leh Nupur Tiwari, Professor, IIPA te pawh an tel a. He hunah hian "State and Participatory Governance in North East India", tih lehkhabu, Prof. Lalhnehzovi'n a remkhawm leh Mittal Publication in an chhutsak chu Governor hian a tlangzarh nghal a ni.