Vawiin khan Chief Minister Pu Lal Thanhawla chuan Industries Department hnuaia Chanmari-I, Lunglei-ah ‘Skill Development Training Centre’ sakna tur lungphum a phum a. He hunah hian Khualzahawm Industries Parliamentary Secretary Pu Joseph Lalhimpuia bakah Lunglei HPC Vice-Chairman Pu S.Laldingliana, ZENICS Chairman Pu Chalrosanga Ralte, Planning Secretary Dr.C.Vanlalramsanga bakah Lunglei District Heads of Departments thahnem tak an tel.

Lungphum phumna inkhawm Industries Addl. Secretary Pu Lalbiakthanga kaihhruaiah Khuallian Chief Minister Pu Lal Thanhawla chuan India ramah thalai kum 25 hnuai lam hi zaa 40% nia chhut a ni a, khawvel ram dangte aiin an tam zawk avangin Sorkar Laipui pawhin thalaite hmakhua ngaiin Skill Development Ministry dinin hemi lamah nasa takin hma a la chho mek a; Mizoramah pawh thalaite tan sorkarah hna a vang tan tawh avangin skill development lamah state sorkar chuan chak takin hma a la zel dawn a ni, a ti. Lunglei District hmasawnna tura Lunglei District MLA-te thanhnemngaihna leh inpekna fakin Chief Minister chuan vawiina Skill Development Centre lungphum phum a ni ta pawh hi Lunglei District tan thil chhenfakawm tak a nih ngei a beisei thu a sawi a; thalai tam takte tan mahni kutthemthiam thil hmanga eizawnna ngelnghet an neih theihna tura rahbi pawimawh tak a ni, a ti bawk. Mizoram hmasawnna tura sorkar hmalakna leh ngaih pawimawh thil hrang hrang tarlangin Chief Minister chuan ITI leh Polytechnic te tihchangtlun te, Science & Technology lamah hmalak chak te, food processing te, handloom leh handicrafts dehchhuahna leh thawnchhuah hmunpui tur Handloom Export Facilitation Hub te, Thenzawl-a din tur Horticulture College te, leilung hausakna haichhuah te leh border trade hmangin Mizote khawvel a tihdanglam theih a ni a ti a. CAG Report-in Mizoram chhunga Cooperative sum dehchhuah nei lote tihtawp tura thurawn pe mahse state sorkar chuan heng Cooperative hnuaia hnathawkte hmakhua ngaiin PPP mode-a kalpui theih turin Company liante nen an indawr mek thu a sawi a. Sorkarin thalaite hmalam hun tur ngaihtuahin kawng hrang hrangin hma a lak mekna chu nu leh pa leh khawtlang pawhin theihtawpa an thlawp a tul a; Mizoramah hnamdangten ei an hmu a, chhungkua an chawm thei laiin engvanginge a ramchhung mipuite hi intodelh lovin kan awm tih hi ingaihtuah ila, inenchiang ila, rilru thar puin ram leh hnam tan thahnemngai lehzualin i thawk zel ang u, a ti.

Khualzahawm Pu Joseph Lalhimpuia pawhin thu sawiin sorkar chuan Department hlui leh hlun berte zinga mi Industries Department hi hmel thar put tir a tum a, nasa takin hma a la zel a; vawiina Skill Development Centre tur lungphum phum a ni thei ta chu Industries Department leh Lunglei tan ni chhinchhiah tlak a ni, a ti. NLUP hnuaiah Lunglei District atan Industries Trade 29 dah niin heng Industry Trade hrang hrang thlang mi 18,347 lai an awm thu tarlangin Pu Joseph Lalhimpuia chuan 1st Phase-ah Rs.1,54,79,400/- leh 2nd Phase-ah Rs.82,62,400/- tanpuina pek tawh a nih thu bakah 3rd & 4th Phase-ah Rs.1,52,04,400 sem tawh niin tunah sem leh tur Rs.1,79,20,000 pawh sanction fel ni tawh a ti. Kumin August thlaa Union Minister of State leh Union Secretary for Textilesten Mizoram an rawn tlawh tuma ‘Block Cluster Development’ pek an tiam kha bawhzui niin tunah hian Mizoram sorkar proposal 7 lai pawm tawh niin, he Project senso zawng zawng tur cheng vaibelchhe 19.00 atangin kumin chhung hian 1st Installment atan cheng nuai 447 hmuh beisei a nih thu a sawi a. Hemi rual hian puantahtu mi 1130 training pekna tur project ‘Integrated Skill Development Scheme’ pawh kalpui mek a nih thu tarlangin, senso tur zawng zawng cheng nuai 112.40 chu sorkar laipuiin pawm tawhin 1st Installment-ah cheng nuai 38.36 hmuh tawh a ni a, hemi hmang hian Thenzawl leh Sawleng-ah puantahtu training kalpui mek a ni, a ti bawk. Mizoram sorkar hnuaia Hindi Teacher ten thla 10 chhung hlawh an lak theih loh, sorkar laipuiah sum an dil chu tunah hian Rs.37,75,37,191/- sanction ni tawhin sem thuai a ni dawn a; a hmaa Hindi Teacher hlawh Rs.19,000/- ni thin chu Rs.29,000/- ah pun chho niin tuna hlawh an sem tur pawh hlawhbi thar hmangin sem a nih tur thu a sawi bawk.

Vawiina Skill Development Training Centre, Lunglei sakna tur lungphum phumna hmunah hiam kum 1948 khan ‘Handloom Weaving Training Centre’ lo awm tawhin, kum tam tak chhung chu tangkai taka hmangin mi tam tak an lo training chhuak tawh a. Hun kal zelah a building chu hman tlak a nih tak loh avangin thiah a lo ni ta a. Hun rei tak hnuah he hmun hman tangkai a nih leh theih nan Indistries Department chuan Bamboo Development Agency(BDA) kaltlangin ASIDE Scheme hnuaiah helai hmunah hian ‘Skill Development Training Centre’ din turin hma a la ta a, he Centre sak nan cheng nuai 243.92 ruahman niin a bultan nan cheng nuai 85 chu dah fel tawh a ni. He Centre-ah hian Weaving Training Centre leh Tailoring Training Centre hawn phawt a ni ang a, hun lo kal zelah skill development thil dang hrang hrang zirna hmun atan pawha hman theih tura ruahman a ni. Buidling hi a dung leh vang 50 ft. ve ve ni ang a; kawngpui hnuai lam hi Basement-ah hmangin lirthei LMV 10 leh Two-wheeler 8 vel leng tura duan a ni ang a; kawngpui an Ground Floor hi ‘Weaving Training Centre’ atan hman tura ruahman a ni a, First Floor-ah ‘Knitting Training Centre’ leh Second Floor-ah ‘Conference-cum-Lecture Hall’ dah a ni bawk ang.