Nimin 6.11.2015 khan N. Delhi-a cham mek School Education Minister Pu H.Rohluna chuan sorkar laipuia MHRD Secretary SC Kuntia a hmu a, Hindi Teacher 1305 te hlawh tur Rs. 37,75,37,191 nawr chhuak.

Hindi Teacher te hian thla riat lai hlawh an la tawh lova, Minister leh Department hotuten vawi engemawzat an lo nawr tawh a, mahse MHRD hotute hian zawhna chi hrang hrang siamin teacher te chungchangah sawifiah tur an siam that zel a, Department hotuten a tul apiang an bawhzui hnuah pawh hlawh tur hi an sanction mai thei lova, Minister hian nimina a nawr leh naah sanctions order hi an tichhuak ta a ni.

MHRD hian thla 10 hlawh tur an pe chhuak phawt a, thla hnih dang hlawh chu RE atanga pek leh a ni dawn a ni.

Minister-in MHRD Secy a hmuhnaah hian School Education Director Pu K. Lalthawmmawia leh Addl. Secretary Pu Lalzirmawia Chhangte ten an tawiawm a ni.

Hindi Teacher te hlawh hi Mizoram sorkar dil angin tihpun a ni dawn a, tun dinhmunah hian thla khatah M/S Teacher ten Rs. 15000 leh H/S Teacher ten 19000 an hlawh a, tunah chuan an vaiin Rs 29000 an hlawh dawn ta a ni.