Chief Minister Pu Lal Thanhawla chuan ‘chanchinbute hi sorkar programme puangzartu leh mipuite tibengvartu an ni’ a ti. He thu hi vawiina Lunglei Press Club Conference Hall a hawnna a a sawi a ni.

Chief Minister chuan democracyah press hian hmun pawimawh tak a chang a, a pawimawhna pakhat chu sorkar programme puangzar a, mipuite tihbengvar a ni a ti a. Tunah chuan chanchinbu te an changkang tawh a, mi ramah chuan editorial neilote chu chanchingbuah an ngailo a ni a ti a. Print leh electronics media bakah social media te an awm chho ta hi thil lawmawm tak a ni a ti a. Chanchinbu copy tlemte nei, sorkar nghenchhan ringawt te hian chanchinbu hlutna an pawt hniam thei a, khawvel changkang zelah hmasawn kan tum tur a ni a ti.

Chief Minister chuan press mite chu sorkar dik leh langtlang, sorkar nelawm a awm theihna turin Right to Information (RTI) hmang tangkai thin turin a chah a. Press mite chu midang aia thil hre zau bik an nih a tul a, editorial lamah pawh hmasawnna nasa takin a tanpui thei dawn a ni a ti. Pawnlam atanga mipawimawh Mizorama lokal thin ten press conference an neih changte a zawhna zawt tam a, zawhna changkang tak tak zawt thin turin  chanchinbumite chu a fuih a. Hei hian an hriatna leh thiamna te ti zauin, hmasawnna pakhat pawimawh tak a ni a ti. Faina lam pawh ziak uar tura chah bawkin, hei hian fai pawimawhna mipuiten an hriat theih phah  thei a ni a ti.

Chief Minister hian Press mite tan Press Enclave Aizawlah siam tura hmalak mek a nih thu a sawi bawk.

Hawnna inkhawmah hian MJA Hqrs President Pu Vanlalrema Vantawl pawhin thusawiin, Press Club conference hall hawn hian MJA tan hun thar a siam a ni a ti,

Pu Thanghmingliana Renthlei, Gen Secy, MJA Dist Hqrs, Lunglei in report pe in, conference hall sak nan hian HPC Lunglei district leh mi thahnemngaite thawhkhawm atanga sak anih thu a sawi a. senso hi avaiin Rs.5 lakhs dawn vel sen anih thu leh bungrua mamawh engemawzat dawrkaite atangin an dawn thu a sawi bawk a ni. Conference hall hi a dung 16 metres leh avang 6 metres a ni.

Inkhawm hi Pu K.Lalrinpuia, President, MJA Dist Hqrs, Lunglei in a kaihrauai a ni.

Chief Miister hi a nupui Pi Lal Riliani bakah Pu S, Laldingliana, Vice Chairman, High Power Committee (HPC), Lunglei Dist in an tawiawm a ni.