Chief Minister Pu Lal Thanhawla chu nizan dar 9:30 khan Sangau atangin Saiha a thleng a. Chief Minister hi Circuit House Saiha ah mi pawimawh engemaw zatin an lo hmuak a. Amah hmuahna inkhawm tawite buatsaih ah thu sawiin mirethei zawk ten lei rem an rah theih nan NLUP chu a taka tih hlawhtlin mek anih thu a sawi a. Mizoram mipui mirethei tam tak ten an dinchhuah pui dawn a ni a ti bawk.
Chief Minister hian vawiin khan Saiha khawpui chawmtu tur Helipad tlang, New Saiha-ah “Greater Saiha Water Supply Scheme “ lungphum a phum nghal a, he lungphum phumna ah hian Chief Miniser chuan thu sawiin Saiha mipuite tui lamah harsatna nasa tak an tawh thu sorkarin a hria a, heng harsatna hrang hrang te sutkian anih theih nan sorkar chuan theihtawp chhuah in hma a la a ni, tiin he hmalakna hi chak taka bawhzui anih tur thu a sawi bawk.
Chief Minister hian vawiin tlai vek khan Mizo Idol 2011 Lalthutha-a hmuahna inkhawm District Playground Saiha Vengpui-a neih chu a hmanpui a, thu sawiin Chief Minister chu Lalthuthaa Mizo Idol 2011 a ni chu a lawmpui thu a sawia tlangval naupangte si hetiang dinhmuna a ding thei chu lawmawm a tih bakah a kal leh zelna turah duhsakna a hlan a, Music ngaina mi a nih thu sawiin Music khawvel ah dawta inpuh chhiatna te a awm thin chu tha a tih loh thu a sawi bawk. Chief Minister chuan thalaite nun kal sual tur siamthat nan Music a pawimawh a ni, tiin hetiang lam a hma kan sawn theih nan TV Channel hrang hrang ten inelna thianghlim thalaite talent phochhuak thei an buatsaih thin chu lawmawm a tih thu a sawi bawk. Lalthuthaa hi Chief Minister thiannu Pu Lal Riliani chuan lawmpuina thilpek a hlan nghal a ni. He Mizo Idol hmuahna ah hian Chief Minister thiannu bakah Pu H. Zothangliana, Parliamentary Secretary, Er. Vanlallianzuala, Chief Engineer (M&I) PHED leh District Bawrhsap Pu Kunal, IAS te pawh an tel a ni. He Idol hmuahna ah hian Chief Minister bakah Pu S. Khipo, CEM, MADC chuan lawmpuina thu a sawi bakah a thawh theih tawk tur MADC ah hna appointment order chu a hlan nghal a ni. District Bawrhsap Pu Kunal, IAS pawhin lawmpuina thu a sawi bakah a kalzelna turah duhsakna an hlan nghal a ni.
