Vawiin chawhma dar 11:00 khan Serchhip Khawtetlanga RMSA Secondary School Building sak thar chu Chief Minister Pu Lal Thanhawla’n a hawng. He hun hi Pu S. Lalthanghuta Sailo, Addl. State Project Director, State Project office, RMSA chuan kaihruaiin, Azaria Laltinkima, State Project Engineer, SPO, RMSA chuan technical report a pe a, Pu Lalsawta, Education Minister chu Khualzahawm niin a hmanpui bawk a ni.

Khuallian Chief Minister chuan zirna lama a bial Serchhip-in duhsakna a dawn avangin a enkawltu Education Minister chungah a lawm thu a sawi a, hetiang malsawmna te hi neitu rilru pu chunga taimakna, rinawmna leh Pathian tihna tak tak nena thawk a, hmang tangkaitu ni turin a dawngtu zirlaite, zirtirtu leh khawtlang mipuite a chah a ni.chgief Minister chuanSchool building thara zirtirtute leh zirlai ten mawhphurhna sang tak an nei tih hr reng turin a chah ngahl bawk a. Zirtirtu tha kan duh avangin a lakna ah kan fimkhur hle a, hetichungin harsatna a tam hle a ni a ti.

Pu Hawla chuan Mizote chu rambuai avangin hmasawnna kawngah nasa takin kan hnufum a, chuvangin he hnam hian siamthat ngai tam tak a la nei a ni tiin; hma a sawn theihna turin mitinin mawhphurhna kan nei a, taimakna, rinawmna leh tih tak takna nena kan thawh a ngai a, chutiang tur chuan sawrkar pawhin theihtawpin hma a la mek a ni tiin, NLUP hmangin mi harsaten lei rem an rah ve theihna tur a ruahman a, he scheme ropui tak hi a hlawhtlinna tur chuan a dawngtuten theihtawp an chhuah ve a ngai a ni a ti.

Khuallian chuan Mizote hi ringtu za a za inti ngam hnam, hnam hrisel ber ni tur si hnam hrisel lo ber kan ni a ti a, heng kan hrisellohna hi keimahni inbel chawp; kan ei leh in kawnga kan fimkhur loh avang leh tûr hmanga keimahni leh keimahni kan inhrai thin avang a nih thu a sawi a. Kohhran mi ni si heti taka mahni taksa tibawlhhlawh thin hnam hian kan Biak In te hi ring lo mite lakah kan tihmualpho a hlauhawm a tih thu a sawi bawk a ni.

RMSA chungchang sawiin Chief Minister chuan hmun hrang hrangah School Building sak mek a ni a, hmun thenkhatah chuan inchhirawm khawpin a chhia a ni a ti a, tuna kan hawn tak pawh hi a rawng hnawih chuan duhthu a sam lo hlea ni a ti. Zirtirtute pawimawhna sawiin Pu Hawla chuan zirtirtute chu file leh bungrua te enkawltu ni lovin Pathian laka kan rochan fanaute enkawltu an nih avangin an pawn lam nun chauh ni lovin, an chhung lam nun thlenga naupangte kaihruaitu ni tlak an nih a ngai a ni a ti. Serchhip khawchhunga sawi hlawh tak, BRTF ram chhuahsan tak chu sawi langin Pu Hawla chuan BRTF te ram chu keimah ngeiin PWD Highway Circle awmna atana ka dil a nih avangin khawtlang mipuiten chumi atana an phal lo a nih chuan BRTF te hnenah ka pe kir leh ang, an ni hi ka bum thiang loan i a ti. Highway Circle Office atana ram an pek phal loh chuan tlangdung khawtin hian an duh vek a, a duhte hnenah kan pe mai ang a ti bawk. Chief Minister chuan School enkawltu te, zirtirtute leh zirlaite chu fai tak leh tha taka enkawla, mite entawntlaka uluk turin a chah a ni.

He huna khual zahawm Pu Lalsawta, Education Minister pawhin thu sawiin RMSA chu pawl IX atanga XII thleng zir theihna a nih thu leh kum 6 atanga kum 14 inkar nagpang zawng zawngte hnena zirna pek vek hi sawrkar mawh a ni a, heng SSA in a tuam phak loh te hi RMSA hmanga enzui an nih thu a sawi a. Ram hmasawnna chu bungrua, hmanraw hrawl pui pui leh khawl ropui tak tak hmang a thlen hmasak chi ni lovin a mi cheng mihringte nihphung leh rilru puthmang atanga tihhmasawn chi a ni zawk tiin Mizoram hmasawnna bul chu zirna chauh hi a ni a ti.

He sikul hawn tak hi Rs. 55,50,460/- hmang a sak a ni a, Classroom 4, Computer room, Science Laboratory, Craft Room, Clerk Room Teachers Common Room leh Headmaster room te a awm a, mipa leh hmeichhe tan inthiarna hrang ve ve a awm bawk a, Headmaster, zirtirtu pasarih, clerk leh Lab. Attendant pakhat ve ve ten an enkawl a class IX leh X zirlai 36 an awm mek a ni.