Nizan dar 6:30 khan Chanmari YMA Hall-ah Art & Culture Minister Pu P.C. Zoram Sangliana’n Mizo Feature Film ‘Khawnglung Run’ a tlangzarh.

Minister chuan Khawnglung Run chu hman lai thil, Mizoten chanchintha an hriat hma, thim chhah tak hnuaia an kun lai hun a thleng a nih avangin fimkhur taka tarlan thiam a tul hle a ni, a ti a. A entute pawhin , inrawk, inrun leh inrawt lai huna thil thleng a nih avangin rilru zau tak pua enthiam pawh a tul a ni, a ti. Film buatsaihtute taimakna leh thawhrimna fakin Documentary leh Feature Film siam kawngah Mizoram a than mawh em em laia harsatna tam tak paltlanga Film puitling an tichhuak thei chu lawmawm a tih thu Pu P.C. Zoram Sangliana chuan a sawi a ni.

Khawnglung Run Film hi Mapuia Chawngthu, Leitlang Pictures, Lunglei siam a ni a. 20 May, 2010 khan film hi siam tan niin Darkhuang tlang, Thenzawl, Tui Rihiau, Mat Lui, Nghasih, Kawmzawl,Zohnuai High School compound leh Pukthiang-ah te film hi chan a ni.