Chief Minister Pu Lal Thanhawla chuan mipui leh sorkar tana tangkai tur chu, a te emaw alian emaw pawh nise ka hawng zel ang a ti. He thu hi tukin zinga Serchhipa Forest Rest House a hawnna a a sawi a ni.

Chief Minister chuan Environment & Forest department-in Serchhipah Rest House neih a tul tih hriaa an sa chu a lawmawm hle a ni a ti a. Hun lokal tur thlirin Circuit House te pawh kan la mamawh tur a ni a, Tourist Lodge turte pawh la en chhoh zel a ni ang a ti. Serchhip chu ram laili a awm anih avangin mi pawimawhte leh zin mite la tlawh tam tur a ni a, mipui lam te pawh khualchhawm thiama, tha taka lo dawnsawnte zir a ngai hle dawn a ni a ti.

Chief Minister chuan kan ram economy hi mau hmanga her danglam tum a ni tiin, mipuite chu Pathian thil siam chungah chanchintha hril turin a chah a. Heng kan boruak tha, mau leh thing leh nungcha te, luia sanghate tha taka kan humhalh loh chuan kan tuchhuante tan kan ram hi chenna tlak lovah kan siam ang tih a hlauhawm a ni a ti a. Khawvela sava vang tawh tak vavu leh a dangte, ramhnuaia nauban vang tak takte hi lakbo theihna lakah kan humhalh tlat a tul a ni tiin, mitinte chu a humhalhtu nih tum turin a chah a ni.

Dikna leh felna kenkawh chungchangah Chief Minister chuan dikna awm tur chuan dik lohna hailan hmasak a tul avangin tunah hian hreh tak chungin case tam tak ziahluh tawh a ni a ti a. Thubuai neia man mai tur thenkhatin doctor certificate an lo neih hman thin avangin man mai theih an nilova. Engtik hunah emaw chuan hetiang certificate pechhuaktu hi khin (challenge) ala ngai mai thei a ni a ti.

Rest House kawtah hian Pu Lal Thanhawla hian rihmim thing a phun a, a nupui Pi Lal Riliani’n Mizorama awmlo, ‘sausage’ tree an tih chu a phun bawk a ni.

Rest House hawn tak hi E&F department hnuaia Intensive Forest Development Scheme atanga Rs.15 Lakhs senga sak a ni a, A building hi departmental construction a sak a ni. VIP room, khum 2 awmna room 2, dining room leh inthiarna/ bualin 4 a awm a ni. Alkatra-a a panna kawng siam nan tunah hian Rs. 11 Lakhs dah a ni bawk.

Hawnna inkhawm hi Pu Lalthangliana Murray, Coservator of Forest in a kaihruai a ni.

Attachment

  • Loading attachment...