PHE Department chuan Tui buaipui man (service charge) chungchangah a hnuai ami ang hian thuchhuah a siam.

1. Tui Bill (service charge) hi kum 2000 March atang daih tawh khan tih danglam lovin hman a la ni a. Thil man sang zelah pawisa hlutna te lo tlahniamin tui bill pawh hi ennawn a hun hle tih sawrkarin a hria a, hemi atan hian PHED chuan sawrkarah rawtna te thlenin kum 2009 atang khan a buaipui tawh a uluk taka sawrkarin a zir chian hnuah tuna tui bill thar hi a lo piang ta a ni. India ram khawpui hmasawnna hrang hrang atana kan sum hmuhna hnar ber Programme te (eg JNNURM etc.) chuan khawpui tui lak (water supply scheme) te chu a enkawl zuina ah amah leh amah intodelh/intungnung thei turin a rawn phut ta zel bawk a. Hei em hi chu keini ram ang, tui dehchhuahna hautak bik (high head pumping) tan chuan tih ngaihna a awm hrih lova. Amaherawhchu, Mizoram sawrkar leh ADB ten kum 2009 a MoU an lo sign tawh te bawhzuiin, sawrkar in mipuite tui a pekna atana senso engemaw chen tal hmu let turin hetiang hian ruahmanna a lo piang a ni.

2. Aizawl mipuite hnena tui thianghlim sem tura sorkarin sum a sen hi litre 1 ah paise 8 vel a ni a. Tuna tui bill thar ang hian thla khat a tui 5,000 litres dawngin Rs. 100/- a chawi tur a ni a, litre 10,000 a dawn chuan Rs. 250/- a chawi tur a nih laiin sawrkar chuan heti zat tui pe tur hian Rs. 863/- vel a seng zel a ni. Mimal ten motor hmanga tui an zawrh (tih thianghlim ni lem lo) hian 4,000 litres hi Rs. 1,200/- vel a ni tlangpui a. Mimal hnen atanga tui 10,000 litres lei tur chuan Rs. 3,000/- lai sen a ngai a ni. Chuvang chuan sawrkar in tui bill thar a siam hi tunlai thil mam nena khaikhin chuan a sang viau lo a ni.

3. Tui bill tih danglam anih avang hian mipui ten kan tui hmuh/dawn hi a pung thut thei lo va. Tui tam zawk kan hmuh theih nan sawrkar chuan theihtawpin tan a la reng a ni.

4. Tui connection neiin thla khat ah tui 2,500 litres aia tlem a dawn chuan, Consumer te hian bill an pek hma ngeiin a bialtu Executive Engineer/Sub-Divisional Officer hnenah complaint an thehlut tur a ni a. An complaint hi finfiah hnua a dik anih chuan an tui bill hi Department in 50 % in a tih hniam sak thei ang. Tui bill bek tawh hnua complaint erawh chu tih danglam theih a ni lo ang.

Ruahtui dawngtha ram kan nih avang hian mahni intodelh thei khawpin tui dahkhawlna lamah ngaihtuahna sengin ngaih pawimawh berah i nei thar deuh deuh ang u.