Nimin khan Chief Minister Pu Lal Thanhawla chuan Champhai Grape Grower Society ta Grape hmanga wine siamchhuahna Tlangsam winery a tlawh.
Champhai Grape Grower Society hruaitute nen Grape hmanga wine siamchhuah tam leh zual dan tur chungchang an sawi ho. Champhai Grape Grower Society hruaitute chuan wine an siamchhuah dan te leh wine siamchhuah kawnga an harsatna te Chief Minister hnenah an lo thlen a. An khawl neihin a tlin loh avanga Champhai Bial a kut hnathawktute grape thar chhuah an lak zawh sak theih loh thu te, tui dah khawlna an neih that loh thu te leh an building neih mekin a zawh loh thu te leh wine siam chhuak tam lehzual tura an mamawh chi hrang hrangte Chief Minister hnenah hian an lo thlen a. An hnathawh dan te a hmun ngeia a tlawh avangin lawmthu sawiin, a hmalakna avanga hmasawnna kawng in hawng mek avangin lawmthu an hrilh a.
Chief Minister Pu Lal Thanhawla chuan Champhai Grape Grower Society hruaitute harsatna tawh chu harsatna lawmawm tak a ni a ti a, a kaihhruai sawrkar chu mi lian leh mi hausa te ngaihsaktu ni lovin kut hnathwktu miretheite sawrkar a ni a, Pathian hnam thlan retheite chhanchhuahna atana duan NLUP chu a kaihhruai sawrkar hnuaiah chhungkaw 100 telin hlawhtlinna an hmu tawh a ni a ti a, Champhai Grape Grower Society-te hnathwh NLUP hlawhtlin theihna kawng anih avangin thil lawmawm tak a ni a ti bawk. Chief Minister chuan an Wine siam chhuahte chu in hlawh lehzual a nih theih nan a siam chhuah ni leh a thihni ziak lang turin a chah a, Market zau zawk nei turin uluk lehzual turin a chah bawk. Society hruaitute chu anmahni hlawkna ringawt ngaihtuah lo va, kut hnatawhtute dinchhuahna tur an ni tih an ngaihtuah tel tur a ni ati a, MLTP Act hlih anih avangin ram dang atangin wine chi hrang hrang a rawn lut dawn a, chung ram dang wine te nen a khaikhin theih tura tan la turin a chah bawk.
Chief Minister hi MLA Pu T.T. Zothansanga leh Pu R .Vanlalvena ten an tawiawm a ni.Chief Minister hian zan li Champhaia a cham hnuin vawiin khan Champhai chhuahsanin Aizawl a pan a, Khawzawl leh Kawlkulhah hun a hmang leh ang.
