Vawiin khan Horticulture Minister Pu P.C. Lalthanliana chuan Horticulture hnuaia DHO te Annual Action Plan Meeting Horticulture Directorate Committee Room-ah a neih pui. He meeting-ah hian Parliamentary Secretary Pu K. Lalrinthanga leh Horticulture Secretary Pu H. Lalhmingthanga pawh an tel a, district tin atanga Divisional Horticulture Officer ho pawh an kim a ni.

Minister chuan thu sawiin phun belh zel aiin phun sa enkawl that hi kan mamawh a ni, a ti. Kan sum neih ang angah ruahmanna fel leh tha zawk kan neih thiam a tul a, MP leh MLA zawng zawng ten an bial theuh a Model Village an thlan turah an khaw thlante zir chianga Horticulture Model Village a nih theih nana a tul angin ruahmanna kal pui tum nise a that a rinawm a ti. Thei leh thlai tam tak kan chingin kan phun belh zel bok lai hian a bikin ser ah phei hi chuan phun belh aiin phun sa enkawl ngun hi kan hlawk zawk ang em tih ngaihtuah a tul a ni a ti. Mizo te hian kan thlai leh thei phun reng reng hi a enkawlna kawngah kan in thlahdah a, a hun taka leitha pek te kan ngaihpawimawh a tul a, a enkawl zui danah tun aia tan lak hi Farmers ten an mamawh ni a a hriat thu Minister hian a sawi bawk.

DHO tin te chu an Division huam chhungah, farmers te an potential area neih dan a zirte ngaihtuah pui chunga hlawhtlinna tlang thlenpui tumna tak tak a, theihtawp chhuah theuh turin a chah bawk.