Lead Bank, Lunglei District leh RBI, Guwahati hmalaknain Lunglei District khaw hrang hrang-ah mipuite Bank hnathawh dan leh kalhmang chungchanga inzirtirna neihpui mek zel a ni a. Vawiin khan Zobawk-ah 'Financial Literacy Campaign' nei a ni a; AGM, RBI Guwahati Pu Saibal Chakraborty leh Lead Bank Manager Pu James LH Pachuau ten zirtirna hun an hmang.

Financial Literacy Campaign Zobawk Community Hall-a neihah hian khaw mipui bakah HSS leh HS zirlaite an kal thahnem hle a, a bik takin PMJDY chungchanga hrilhfiah an ni. RBI AGM Pu Saibal Chakraborty chuan Sorkarin mi harsa zawkte chu ramchhung sum leh pai che velah chanvo lian zawk an neih a duhsak hle a, chuvangin Bank kaltlangin Insurance, Deposits leh Loan hmanga an dinhmun tihchangtlung tura ruahmanna hrang hrang power presentation hmangin a hrilhfiah a ni. PMJDY chungchang 'film' pawh entirin chhungkaw tinah Bank Account 1 tal nei turin eng Bank pawh dawr theih a nih thu Pu James Pachuau-in a hrilh bawk a ni.

Financial Literacy Campaign hunah hian Zobawk High School hnenah water filter pakhat leh Zobawk Higher Secondary School hnenah Dekchi lian pakhat pek a ni a. Zobawk-a chhungkaw 68 te hnenah 'Financial Diary' sem niin he diary-ah hian an nitin sum lut zat leh hman zat an chhinchhiah ang a, chu chuan inrenchemna kawngah mipuite tan a tangkai thin thu bank hotuten an sawi bawk. He Campaign-a tel Bank hrang hrang - SBI, Axis leh IDBI - ten 'stall' hawngin mipui atangin a duh apiangin a hmunah Bank account thar an hawng nghal a ni.