Vawiin khan Mizoram Chief Minister Pu Lal Thanhawla chuan Zawlnuam College Building thar, Cheng nuai 70 senga,  Rastriya Uchchatar Shiksha Abhiyan (RUSA) hnuaia sak chu a hawng a,  Kanhmun khua-a Indoor Stadium sak thar a hawng bawk.

Pu Lal Thanhawla Chief Minister hian kalkhawm zawng zawngte duhsakna  hlanin kumthar chibai a buk a, Zawlnuam College Building Cheng nuai 70 lai senga  sak hawn a ni thei ta chu lawmawm a tih thu a sawi,  Mizoram sawrkar chuan Quality Education  ngaihpawimawh hle a,   chumi a nih avang chuan Mizoram hmun hrang hrangah RUSA kaltlangin College thar leh a hlui thuamthat chhoh mek zel a ni a ti, Govt Zawlnuam college a thawktute chu zirlai te tana entawn tlaka in vawng turin a chah a, zirlai naupangte pawh tumruhna, tum bulfuk tak neia hmalam thlir turin a chah bawk.Tun hma lamah chuan zofate zingah rampawn dengchhuak Officer lian tak tak an awm thin a, thangthar te zingah tun aia central service leh civil service  ah te in ziak tling tura tan la thar sauh sauh turin zirlai te a fuih a ni. Zirna hi mizoram Sawrkar ngaihpawimawh ber a nih vangin India ramah 27 na turin Mizoramah Sainik School hawn a ni ve ta a, Hmeichhe zir theihna bikah phei chuan India rama awm chhun a ni a ti, Sainik school chuan  nunphung pangai taka naupang  chherchhuahna  hmun pawimawh tak a ni a ti bawk.

Chief Minister chuan zirlaite fuihna thu lar tak nakina kan ram hruaitu turte in la ni tih hi a ni, chumi thleng thei tur chuan aia upate zahthiam, tumruhna bakah a  pawimawh ber chu nu leh pa thuawih a ni a ti, zirlaite chu tunlai thiamna technogy hmang tangkai a, khawvel thiamna mil zel a inchherhriam turina chah a ni.

Pu Lal Thanhawla Chief Minister chuan Govt Zawlnuam College chu National Institue of Electronics and Information Technology(NIELIT) hnuaiah Computer zirna tur hawn a nih dawn thu a sawi a, College Building te pawh a theih  ang anga thuam that chhohzel a ni dawn a ni a ti, Govt Zawlnuam College zirlai ten an beisei angin Study Tour Bialtu MLA nen an ngaihtuah dawn thu sawi bawk.

Mizoram Chief Minister  chuan Mizoram  sawrkarin mipui hriselna Health care a ngai pawimawh hle a, mizote chu zuk leh hnuam, ei leh in ah kan in vawn thianghlim a tul takzet a ni a ti, Mizote kristian  ram tia miten min hriat leh min hmuhdan a ni a, zuk leh hnuam ah kan fihlim loh lutuk avangin kan hmel kan tibal thin a ni  a ti bawk , an lo hrisela kan zahawm zawk theihnan  zuk leh hmuam laka fihlim tum zel turin kalkhawmte a chah a ni.

Govt Zawlnuam College hi kum 1986 ah din a ni a,  Kum 2007 khan provincialised niin kum  2016 khan NAAC Accreditation a ni, tunah hian zirlai 50 awm mekin  Subject paruk Economics, Education, Political Science, Mizo, English , History,  zirtheihna te a awm a, teaching staff 18 leh Non Teaching staff paruk an awm mek a ni. Vawiin Building  hawn tak hi a zauzawng  dung ft 83.5 leh avang ft 26.5 a ni a, NEDP hnuaiah College Library hi tihchangtlun tum mek a ni.

Chief Minister hian Zawlnuam vengpui Field stadium sak lai mek a tlawh a, he field ah hian infiamna chi hrang basketball, volleyball, football khelh theihna tura ruahman a ni.

Chief Minister hi Pu John Rotluangliana, Minister, FCS & CA, Transport, Tourism, Pu Lalrinmawia Ralte, MLA, Political Adviser, Pu Lalrobiaka, MLA, ZIDCO Chairman, Pi Lalbiaksangi, Mamit District Bawrhsap, SP, Mamit,  Commandant 4th IR leh  District Officer hrang hrang bakah  khawtlang hruaitute'n an tawiawm a ni.