Vawiin khan Health Minister Pu Lal Thanzara chuan Aizawl Civil Hospital Auditorium-ah Association for Voluntary Blood Donation (AVBD) ten an buatsaih ‘State Level Training on Voluntary Blood Donation’ a hmanpui.

Health Minister Pu Lal Thanzara chuan AVBD ten State pum huap training on Voluntary blood Donation an buatsaih chu lawmawm a tih thu sawiin midang thatna tur ngaihtuahtu pawl AVBD hi Mizoram mipuiten kan ngaihhluta, an hnathawh leh hmalaknate kan tawiawm thin a pawimawh, a ti a. Health Minister chuan Voluntary blood Donation a hmasawnna tarlangin Kum 1993 ah khan a thlawna thisen pek (Voluntary Blood Donation VBD) chu 1.79% chauh anih laiin tunah erawh chuan Mizoramah Blood Bank 10 kan nei tawha heta thisen pek zawng zawng zinga a thlawna pek (VBD) chu 80% chunglam a ni tawh, a ti a. Blood bank changtlung leh khawl tha te sawrkarin ngaihtuah zel dawn mahse thisen petu tur an awm loh chuan a thlawn mai dawn a ni tiin thisen petute pawimawh zia a tarlang a. Mizoram ah tlawmngai pawl hrang hrangte hmalakna in thisen pek  uar chhoh zel ani chu lawmawm a tih thu sawiin chutih rualin thisen mamawhna a san chhoh ve zel avangin tan lak deuh deuh a ngaih thu a sawi a. Blood Bank-a thawktute indaihloh avanga thisen pe duh tu te pawhin duh anga an pe theilo thin chu pawi a tih thu sawiin he harsatna sukiang tur hian sawrkarin hma a lak mek thu a sawi bawk a ni.

Health Minister chuan thisen pe tur chuan taksa leh nunphung hrisel neih a ngaih thu sawiin thisen thianghlim mipuite tana him pe thei turin mi tinte nun invawng uluk turin leh ruihtheihthil laka fihlim turin a chah a. Mizoramah a bikin hmeichhia nau nei ten thisen pek an mamawh fo chu ei leh in, zuk leh hmuam vangte niin a lang, a ti a, khawtlang hrisel zawk nan Mizo mipuiten ei leh inah leh taksa insawizawi lamah te tun aia nasaa tan lak a tul a ti bawk. Pu Lal Thanzara chuan Donation Camp atang ringawt chuan Mizoram thisen mamawh zat a phuhruk theih loh thu sawiin India ram state dangah pawh thisen vawi 100 aia tam pe (Centurion Donor) tam tak an awm a, chuvangin Mizoramah pawh thalai rual zingah a tam thei ang ber ‘Regular Blood Donor”(thla thum dana thisen pe thin) buatsaih a pawimawh a ni, a ti.  Health Minister chuan Mizo nula leh tlangval zingah Regular Blood Donor leh Centurion Donor tam tak an awm theihnan training-a kal khawmte chu theihtawp chhuah zel turin a fuih a ni.

State Level Training on Voluntary Blood Donation ah hian AVBD General Secretary Pu C.Lalnunnema’n  report  a pe a. Chawhma hunah hian “Basic Blood Science & Donation Criteria” tih thupui hmangin Dr B. Lalnunthari ,BBO, Synod Hospital-in zirtirna a pe a, Dr ST Lalhriatpuii, BBO Lunglei chuan “Principles of Donor Motivation and Techniques” tih thupui hmangin zirtirna a pe bawk a, sawihona hun Dr Zoramdinthara, Vice President, AVBD leh Dr K. Rothangpuia, Tech Adviser, AVBD ten an kaihruai a ni. Chawhnu session-ah hian thupui pahnih “Concept of Voluntary Blood Donation & VBD Movement” leh “Christianity and Voluntary Blood Donation” ahte Pu C. Lalnunnema, Gen. Secy AVBD leh Pu Lalrinmuana ten zirtirna pe lehin sawihona hun Dr. C. Zohmingliani, Treasurer, AVBD leh Pu K. Zothanpara, Pub Secy, AVBD ten an kaihruai a ni.

Training –ah hian YMA hruaitute, Kohhran hrang hrang thalai pawl hruaitute, NSS programme Officer te, District tina AVBD hruaitute, MSACS leh Health Department hotute an tel a ni.

AVBD hi kum 1992 khan Aizawlah din a ni a. Mizoramah tun dinhmunah Blood Bank 10 a awm a. Tun kum kal mek 2017-2018 April- December ah hian Voluntary Blood Donation (VBD) chu za zela 83.76 a ni a. Tuna Blood Bank hrang hrang dinhmun chu hetiang hi a ni:

BLOOD BANK WISE DONATION 2017-2018(April- Dec 2017)