369/2026-2027

Aizawl the 4th May 2026: New Delhi-a châm mek Chief Minister Pu Lalduhoma chuan vawiin khan Niti Ayog Member kal chhuak tur Dr VK Paul chu Mizoram House, Chanakyapuri, New Delhi-ah a kawm a, Mizoram hmasawnna tur kawng hrang hrang an sawi dun.

Dr. VK Paul chuan a hun chhunga Mizoram sorkar nen ṭha taka an thawh dun avangin lawmthu a sawi a, Chief Minister Pu Lalduhoma hmalakna hrang hrang fakin Niti Aayog nen thawhona ṭha tak an nei thei chu lawmawm a tih thu a hrilh a. Mizoram chu state ralmuang tak a nih thu state dangten an hriatpui thu a tarlang.

Chief Minister pawhin Niti Aayog-in Mizoram a duhsaknaah lawmthu sawiin sawhthing chungchanga hmalakna an neihte chu Mizoram in a chhawr mek thu a sawi a, "Ginger Capital of India-ah min puang khan rah ṭha a chhuah chho zel a ni," a ti. Mizoram chu ziak leh chhiar thiam vekna state hmasa ber a nih thu te, eirukna leh hlemhletna laka state fihlim ber a nih thu te, khualzin hip kawnga hmasawn nasa tak a nih thute leh India rama state ralmuang ber a nih mek thu hrilhin, "Tun hnaiah silai keng pawl awm chhunte pawh remna kan siampui leh tawh a ni," tiin Mizoram hmasawnna langsarte a hrilh a ni.

Inkawmnaah hian Pu Lalnghinglova Hmar, Tourism Minister pawh telin Niti Aayog leh Mizoram sorkarin Tourism Conclave an buatsaih dun tur chungchanga hmalaknate an thlir a. May thla chawhnu lamah Delhi-ah pre-conclave meeting neih an rel bakah Tourism Conclave-a Niti Aayog hmalaknate official lamin an hrilhfiah a ni.

Niti Aayog lam hian Mizoram tourism policy changtlung zawk duan dan tur te, Mizoram puala Institute of Hotel Management-Ashok (IHM-A) hnuaia a thlawna training neih theih dante leh investor koh luh chungchangte Chief Minister leh Tourism Minister hi an sawipui bawk.

He hunah hian Pu Alexander V Chongthu, Addl. Resident Commissioner, Mizoram House; Pi R Lalrodingi, Director, Tourism Department, Pu Lalrinawma Khiangte, PS to CM-ten Chief Minister hi an ṭawiawm a; Niti Ayog aṭangin Swapnalee Batacharya, Dy. Director General leh Dr. Pricilia C Ngaihte, Consultant-te an tel bawk.