3481/2024-2025

Khawzawl, dated 11th December 2024: Vawiin tlai dar 3 khan Hon'ble Chief Minister Pu Lalduhoma leh Excise & Narcotics Department Minister Pu Lalnghinglova Hmar chuan Khawzawl DC Office-ah Ruihhlo Do chungchang meeting an nei a, office hotu te, NGO leh tlawmngai pawl hotu te, kohhran leh thalai pawl hruaitute leh home enkawltute an tel a ni.

CM Pu Lalduhoma leh Minister Pu Lalnghinglova Hmar chuan meeting tan hma hian ADIP scheme hnuaia distribution camp neih mek denchhenin vohbik (Persons with Disabilities) te tana aids and appliances te an sem a, wheelchair te, walking stick te, braille set te, hearing aid leh vohbik te tangkai pui tur thil hrang hrang an sem a ni. Heng implements hi Artificial Limbs Manufacturing Corporation of India (ALIMCO) atanga dawn an ni.

Minister Pu Lalnghinglova Hmar chuan meeting a kaihruai a, Khawzawl district a zu leh ruihhlo dona kawnga sawrkar leh khawtlang dinhmun te, hmachhawp te, harsatna te leh rawtna an ngaihthlak duh thu a sawi a. Keynote address pe turin Khawzawl DC Pu K. Vanlalthiana a sawm a, DC chuan ruihhlo do chungchanga Khawzawl district dinhmun sawiin report hrang hrang an dawn atanga an thil hriat te, drugs an man zat te, check gate neih dan dinhmun te a sawi a, tanpuina an mamawh hle thu a sawi bawk. Hemi zawh hian CM Pu Lalduhoma leh Minister Pu Lalnghinglova Hmar chuan office hotu te, YMA hruaitu te, kohhran hruaitu te, VC member te, MUP hruaitu te, ngawlvei enkawlna home a thawk te thu sawi hrang hrang an ngaithla a, an mamawh te, rawtna te leh vuina te an ngaithla a ni. CM Pu Lalduhoma chuan sub-headquarters YMA president hnenah sum fai a hlan nghal bawk a ni.

Chief Minister Lalduhoma chuan meeting khaikhawm nan thu a sawi a, zu supply tihhniam a pawimawh a tih thu a sawi a, hemi kawngah hian khawtlang leh district hruaitute puih a inhuam reng thu a sawi. Zu hralh a awlsam zia a hriat thu sawiin Mizoramah zu a hluar em em hi pawi a tih thu a sawi a, do dan tur hrang hrang hi nasa takin sawrkarin a ngaihtuah mek a ni tih a sawi bawk. State level task force puih dan tur te, excise & narcotics department a ngaih pawimawh zia leh recruitment an kalpui dan te a sawi lang a, tlawmngai pawl te nena thawhho zel a beisei thu a sawi bawk. Meeting tel tura lo kal khawm zawng zawng te hnenah lawmthu a sawi a, an thil thlen zawng zawng an lo chhinchhiah vek a ni tih sawiin an theih dan apiangin a tanpui ang tih a sawi a ni.

He meeting-ah hian Excise & Narcotics Department Secretary Pu Lalramsanga, IRS leh Excise & Narcotics Department Commissioner, Pu Z. Lalhmangaiha te an tel bawk a ni.

CM Pu Lalduhoma leh Minister Pu Lalnghinglova Hmar hi Champhai district lam panin an kal chhunzawm a, naktukah ruihhlo do meeting hi an neih pui leh dawn a ni.