3482/2024-2025

Saitual, the 11th December, 2024: Vawiin chawhma dar 11:00 am khan DC Conference Hall, Saitualah Chief Minister Pu Lalduhoma hoin ruihhlo do chungchangah thutkhawmna neih a ni a, he hun hi Excise & Narcotics Minister Pu Lalnghinglova Hmar chuan a kai hruai.  

He thutkhawmah hian Chief Minister Pu Lalduhoma chuan thusawiin district thar chu kutke kima awm turin a tha tawla tihchangtlun ngai tih sawi a. Hei vang hian Saitual district-ah pawh District court leh jail mumal tak a la awm lo a ni, a ti. Jail mumal zawka a neih a nih theih nan hnathawk tur lak a ni dawn tih a sawi bawk. 

Chief Minister chuan ruihhlo ti rem tur chuan ruihhlo pek chhuah tih tlem (supply reduction) a pawimawh ber tih a sawi a. Mamawhna sang mahse hmuh tur a tlem chuan ruihhlo chu a rem thei dawn a ni, a ti. Ruihhlo ngaite chu tuam hlawm an ngai tih a sawi a, mahni kut kea ding theia enkawl chu ruihhlo bawiha an tluk leh loh nana pawimawh tak a ni, a ti.   

Pu Lalduhoma chuan sawrkar hnathawk zingah hna thawk tha thei loa rui nileng an awm thin chu pawi a tih thu a sawi a. Sawrkar hnathawk te tha taka an hnate an thawh loh chuan Sawrkar a chak thei lo a ni, a ti.  Chief Minister chuan Excise & Narcotics department ngat phei chu ruihhlo do tur an nih angin ruihhlo zuartute nena an  inthurual leh inkungkaih a thiang lo hulhual tih a sawi a. He hunah hian a kalkhawmte chu ruihhlo do kawngah dawhthei taka hma la zel tura chahin, hmasawnna hmel a hmuh thuai a beisei thu a sawi bawk. 

Excise & Narcotics Minister Pu Lalnghinglova Hmar pawhin thu sawiin, Mizorama ruihhlo tih rem a nih theih nan kohhran leh khawtlang hruaitute, tlawmngai pawlte leh department hotute chu tanghoa beihpui thlak a tul a ni, a ti. Excise Minister chuan kalkhawmte chu an ngai mawh zawng leh vei zawng te, rawtna leh sawiselna te chu inhawng taka sawi turin a sawm nghal a ni. 

He thutkhawmah hian kalkhawmte chuan an vei zawngte sawihona leh zawhna leh chhanna hun an hmang a. Pu Peter Zohmingthanga, Jt. Commissioner, Excise & Narcotics department chuan kalkhawmte zawhna chhangin, ruihhlo dona kawnga an hma lak dante leh an department dinhmunte a sawi nghal a. Excise & Narcotics department chuan ruihhlo dona kawngah sub-hqrs YMA, Saitual te chu tanpuina sum fai pein, Chief Minister Pu Lalduhoma chuan a hlan nghal a ni.   

Ruihhlo do thutkhawm hi Excise & Narcotics Minister Pu Lalnghinglova Hmar chuan kaihhruaiin, Chief Minister Pu Lalduhoma leh Saitual Bawrhsap Dr. Lalngura Tlau chuan thu an sawi a. He hunah hian Excise & Narcotics department atangin Lalramsanga Sailo, Secretary, Pi Malsawmdawngliani,, Joint Secretary leh Pu Z. Lalhmangaiha,Commissioner bakah Saitual district chhunga department hrang hrang hotute, kohhran leh khawtlang hruaitute leh tlawmngai pawl hotute an tel a ni.