2494/2026-2027  

Lunglei, 2026 Khuangchawi Thla ni 2: Mizoram Chief Minister Pu Lalduhoma chuan vawiin khan Lunglei Convention Centre-a Students' Self-Support Union (SSU) General Assembly vawi 40-na chu Khuallian niin a hmanpui.

Chief Minister Pu Lalduhoma chuan zirlai naupang, nu leh pate thla zar hnuaia la awm rual lek ni chunga zirna kawnga mahni mamawh thawh chhuah tuma beitute intel khawmna Students' Self-Support Union chu Mizorama ṭhalai pawl ngaihsanawm ber pawl nia a hriat thu sawiin, an pawl din chhan leh thil tum chu ropui a tih thu a sawi a. Lehkhathiam nih leh kum tam ringawt chu mi puitling nihna a ni lo tih sawiin, SSU thil tum tihhlawhtlin chu degree hlawh chhuah ruala chhawr tlak tak nih nghal theih nana thil pawimawh ber zinga mi a nih thu a sawi a. Ṭhalaite'n zirlai nih laia sumdawnna te, kut hna thawka inhlawhna te, network market leh e-commerce te an tih hram hram chu a hlawh tam lam aiin tawn hriat ṭha tak an neih phahna a nihna chu a hlutna leh mi puitlinga anmahni siamtu a nih thu a sawi.

 Nu leh pate'n ṭha taka an enkawl theih reng ni chunga mi puitling zawk nih duha mahni mamawh thawh chhuah tuma bei mekte chu hlu leh chhuanawm a tih thu sawiin, Chief Minister chuan retheihna avang leh loh theih lohna avanga bei fan fante pawh Pathianin mi puitling ni tura a duhte chu awlsamna emaw, nawmsakna emaw a pe hmasa ngai lo tih hre turin a chah a. Harsa taka hna an thawh hram hram avanga inngai hnuaihnung bik lo tur leh vanduai bik riauva inngai lo tura chahin, harsatna chu anmahni tat hriamtu lungtat leh tawn hriat tam tak petu atan hmang turin a chah a. SSU chu a din chhan leh a thil tuma ding nghet tur leh Pressure Group ang maia awm lo tura chahin, an member-te thawh tur inhlawhna (part time job) an ngaihtuah ṭhin chu chhunzawm zel tur leh zirlai naupang, mahnia inchawm chunga lehkha zir, hun awl neih loh vanga SSU-a intat lut hman lote pawh dap chhuak a, fuih a, a theih ang anga ṭanpui turin a chah.

 Chief Minister chuan Mizoram sawrkarin ṭhalaite tan hma lakna a ngah thu leh ṭhalai taimate tan jubilee dar an vuak mek thu sawiin, sawrkar hna lak tinreng dik taka kalpuiin, a thiam thiam lak an nih thu a sawi a. Mi zawng zawng tan intluk tlang taka remchang siam vek a nih thu sawiin, sawrkar hna thawk tura sawipuitu ṭha ber chu thawhrimna a nih thu a sawi a. Ṭhalai, sports lama talent neite dap chhuah hna kalpui mek a nih thu leh chher zui tlak nia hriatte chu Handholding – Empowering Mizoram Sports hmangin an banah kaih a nih tur thu sawiin, sumdawnna leh thil siam chhuah lama theihna neite tan Flagship Scheme – Bana Kaih kalpui mek a nih thu a sawi a. Thil thar hmu chhuak a, sumdawnna kalpui theite tan Bana Kaih Venture Capital Fund siam a nih thu leh venture capital fund siam chu Mizoram chanchina a vawi khatna a nih thu a sawi. 

 Chief Minister Pu Lalduhoma chuan sawrkarin industry lamah uar taka hma lak a duh thu leh Mizorama lo neitute thar chhuah beh chhana industry din theite tan phei chuan sawrkar a inhawn lehzual thu sawiin, Fruit Beer/Juice siam phalna dan neih thar beh chhanin ṭhalai tam takin a siam chhuah dilna an theh lut tawh tih a sawi a. Kut hna thawka ei zawngte tan thlai thar leina a hranpaa Budget-a dah a nih thu leh thlai thar lei kum 2 kalpui hnuah a thawh thumna kalpui ṭan a nih leh tawh thu sawiin, chhungkaw tam takin an din chhuahpui thu leh kum khata cheng nuai 20 dawn dawn la lutte pawh an awm thu a sawi a. Handholding version 3.0-ah thil thar pakhat – ṭhalai ram dang (foreign)-a hna thawh tumte tana loan awlsam siamsak tum a nih thu a sawi a. Sawrkarin kil tinah ṭhalaite leh mipuite tan remchang a chhawpsak mek tih a sawi.

 Chief Minister chuan Mizoram sawrkar chuan hmathlir fel tak leh tum bulfuk tak a nei tih sawiin,  Viksit Bharat 2047 hnuaia ram changkang (developed nation) ni tura hma laknaah NITI Aayog Vision Document-a kum 2047-a India GDP tur target aṭangin Mizoram chuan Vision Mizoram 2047 a duan angin kum 2047-a India GDP 1% lo thawh chhuah ve tum a nih thu a sawi a. Viksit Bharat 2047 GDP target chu a sangin, 1% pawh chu sang tak a nih thu sawiin, tuna Mizoram state dinhmun aṭanga teh chuan kum 2047-a India GDP target-a 1% thawh pha tur chuan kum tin Mizoram GSDP chu 20% chung lama a ṭhan chhoh a ngai tih a sawi a. Chumi tihlawhtling tur chuan kalphung thar ṭha zawk kalpui chhoh zel a nih thu sawiin, Mizoram State Project Monitoring Committee din a nih thu leh project kal laite endik hna an thawh char char thu a sawi a. State sum leh pai a lo pun theih nan Resource Mobilisation Committee din a nih thu leh uluk taka zir chungin sawrkar sum leh pai renchem theihna lai te, chhiah tam zawk hmuh theihna tur te, chhiah awl rute dap chhuahna tur te an duang tih a sawi a. Chhiah chu state sum hnar a nih avangin mipuite pawhin kan pek tur chhiah hi chu ṭha taka kan pek a ṭul tih a sawi.

Chief Minister chuan hmasawnna chak zawka a kal theih nan inkal pawhna kawngpui tam zawk a awm theih nan chhim–hmar lam zawng chauh ni lovin, chhak–thlang lam zawnga kawngpui neih belh dan ngaihtuah a, ruahmanna siam leh bawhzui mek a nih thu te, Bangladesh nena insumdawn tawnna kawngpui pawimawh Pukzing–Silsury pawh laih mek a nih thu te a sawi a. Mizoram chu India hmarchhak tana sumdawnna kawngpui thar a nih thuai theih nan KMMTTP chu rang taka tihpuitlin a ngai tih hriain, central sawrkar an sawipui reng thu leh state ei leh bar dinhmun (economy) bakah, vantlang nun (society) thlenga nghawng tur a nih avangin a zir chiang tur, Impact Study team din a nih thu sawiin, an report pawh an theh luh tawh thu leh an rawtnate a tahtawla tihhlawhtlin tum a nih tur thu a sawi a. Kawlphetha (power) lama intodelh turin sawrkar chuan nasa taka hma a lak thu a sawi bawk.

 Chief Minister chuan zirna lamah Mizoram Engineering College chu a takin a kal thuai dawn tih sawiin, Mizoram State University pawh chak taka um zui zel a nih thu leh a ram tur pawh vawiinah inhlan fel nghal a nih tur thu a sawi a. Sawrkar tharah zirtirtu an lak hnem tawh thu te, sikul dinhmun sang leh changtlung zawka hlan kai (upgrade) thar ṭhahnem tak a awm thu te, sikul building tam tak thuam ṭhat mek a nih thu leh zirtirtu quarters tur pawh sak chhoh zel a nih thu a sawi a. Sawrkar chuan zirna siam ṭhatna tur hmathlir leh ruahmanna fel tak nen hma a la chho zel dawn tih a sawi.

 Chief Minister chuan Viksit Mizoram a thlen theihna tura hna thawktu pawimawh ber turte chu vawiina ṭhalai kum 10 leh kum 29 inkarte hi an nih thu sawiin, tuna sawrkarin ruahmanna hrang hrang a neihte chu ṭhalaite tinzawn a nih thu leh ṭhalaite tan hun rangkachak a nih thu a sawi a. Ṭhalaite chu sawrkarin an tana remchang a siamsakte chhawr ṭangkai a, an kalna kawng tur uluk taka thlang tur leh, eng kawngah pawh kal se, hlawhtling ngei tura theih tawp chhuah turin a chah a. Ruihhlovin a tihbuai loh, mahni kea din tum zirlai naupang ṭhahnem tak an awm chu lawmawm a tih thu leh a thla an tihmuan thu sawiin, tunah hrehawm rih mah se, an lawmna ni, hahdam taka an awm hun, Pathianin sang taka a chawi kan hun a lo la thleng ngei ang tih ring tura chahin, duhsakna a hlan.

He hunah hian Lunglei High Powered Committee (HPC) Vice Chairman Pu V. Malsawmtluanga, MLA bakah, Lunglei Municipal Council (LMC) Chairman Pu Lalzuithanga leh Councillor-te, Lunglei District Bawrhsap Pi Navneet Mann, Superintendent of Police Pu Shivam Siddharth leh Lungleia sawrkar office hrang hrang hotute, tlawmngai pawl, kohhran leh political party hruaitute leh thu thar theh darhtute an tel a. SSU Branch hrang hrang aṭangin hruaitute leh member eng emaw zat an kal khawm a ni.

SSU General Assembly vawi 40-na inkhawm hi SSU General Headquarters Vice President Tv. Lalrinmawia'n a kaihruai a. SSU GHQ Executive Committee Member (ECM) Dr Sawmtea Chhangte chuan Mizoram State Song, "Ro min relsak ang che" tih hla sain, Council of Churches in Mizoram (CCM) President Rev. Dr R. Lalbiakliana'n hunserh a hmang a. SSU GHQ Secretary General Tv. Jacob Lalduhkima'n SSU hma lakna hrang hrang sawiin, President Tv. Robinson Zomuansanga hnen aṭangin thu sawi ngaihthlak a ni. 

He hunah hian SSU GHQ Adviser Tv. James Ramdinmawia kaihhruaiin Self-Support Award 2026 dawngtute chawimawina hun hman niin, Students' Self-Support Award 2026 hi Nl. Lalremruati, Tv. Lalruatsanga leh Nl. Jessica Lalchhanchhuahi te hnenah hlan a ni a. Leitlang Dingdi Cultural Club, Government J. Buana College SSU Branch, Lunglei te'n hnam lam entirin, Ramsangzuali (Women Polytechnic SSU Branch, Aizawl), Mami Fanai leh Bz-i Tochhawng te'n zaiin kal khawmte an awi a. SSU GHQ Finance Secretary NI. Lalrempuii'n lawm thu sawiin hun a khar.

SSU hi May ni 27, 1985 khan Hrangbana College, Aizawlah din niin, thupui atan "Zirna atana mahni intodelh" tih leh "Kut hna thawh chawi san" tih an hmang a. Tun dinhmunah Mizoram chhunga zirna in hrang hrangah branch 30 nei mekin, member 25,000 vel an awm mek a ni.