2495/2026-2027

Lawngtlai, 2nd October, 2026 : Vawiin chawhnu dar 2:00 PM khan Dr.Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan District Catalytic Intervention Plan atanga lei Public Garbage Disposal Truck (TATA 610 SK) leh Bolero Camper(4x4) chu  Sanitation Department, LADC hnenah hlanin, Mobile Medical Unit (MMU) a hman tur Bolero Camper(4x4) chu District Hospital, Lawngtlai hnenah a hlan bawk.

Motor hlanna inkhawm LADC Office tualzawla neihah hian thusawiin, Dr.Lorrain Lalpekliana Chinzah chuan LADC - te   bawlhhlawh paihna tura TATA SK  Truck leh  Bolero Camper (4x4) bakah District Hospital- a Mobile Medical Unit-  atana hman tur Bolero Camper (4x4) chu tangkai taka hmang tura lawm taka a hlan thu a sawi a. State Sawrkarin kawng hrang hranga  ram mipuiten hma an an sawntheih nan theihtawp a chhuah reng thu  sawiin, Lawngtlai khawpui tihhmasawnna atan District Bawrhsap Office-  ah cheng Nuai 100 pek a ni a, chumi atang chuan Lawngtlai khawpuiin a mamawh em em, Bawlhhlawh paihna motor LADC hnenah hlan a ni, a ti. Faina leh thianghlimna kawngah Lawngtlai khawpuiin hmasawnna rahbi thar kai dawn tiin, heihian Mizoram Cleanliness Competition neih thinah pawh rah tha a chhuah ngei a beisei thu a sawi.

Adviser to Chief Minister chuan District Hospital Lawngtlai pawh tihchangtlun chhohzel a ni tiin, Dialysis pawh tihtheih a ni tawh a ti a. Vawiina Mobile Medical Unit-  a  hman tur Bolero Pick Up pawh tangkai taka hman a beisei thu a sawi. MLA chuan Lawngtlai District- hmasawnna atana Bawhrsap- in theihtawp an chhuah thin chu fakawm tiin, District Administration - in State sawrkar ruahmannate theihtawp chhuaha an bawhzui thin chu lawmawm a tih thu sawiin, LADC sawrkar nen lungrual taka an thawkho thin  chu a hlu takzet a ni, a ti. Lawngtlai District- ah ADC pahnih  awmin, State sawrkar nen pheikhairual taka kal a pawiwh hle a ti a, Lawngtlai District- hmasawnna tura chak zawka hmalak zel a nih tur thu sawiin, Lawngtlai District- mipuite sawrkar hmalakna lo tawiawm zel turin a sawm nghal bawk.

Lawngtlai Bawrhsap Pu Donny Lalruatsanga chuan report tawi pekna a nei a.  District Catalytic Intervention Plan- hnuaiah Lawngtlai District chuan cheng Nuai 100 a dawnga, heta tang hian Cheng Nuai 43 sengin Motor pathum te hi  lei a ni, a ti. District Catalytic Intervention Plan- hnuaiah hian hmasawnna hna lawng hrang hranga thawh niin, engemaw zat zawh tawh a ni a, hmalam hunah pawh Lawngtlai District- hmasawnna leh mipuite hamthatna tura hmalak zel a nih tur thu a sawi bawk a ni.

Vawiin hun hmanna hi  Pu K.Lalthanzara, Executive Secretary, LADC chuan kaihruaiin Pu Sanghuliana Mualchin, Dy.CEM chuan kalkhawmte lawmna thu a sawi a. District Administration leh LADC hotute an tel tha hle a ni.

Adviser to Chief Minister leh Bawrhsap - te hian Lawngtlai III, lei tlahniam (Singking Area) a hmunah kalin an tlawh nghal a. Kawngpui tlahniamin lirthei tana harsatna lian a siam loh tur leh mipuite him zawk nana thei ang anga hmalak a nih tur thu an sawi a ni.