2202/2024-2025

Champhai, 25th September 2024: Vawiin khan Chief Minister Pu Lalduhoma chuan Mizo Zirlai Pawl Assembly vawi 68-na, Champhai Tlangsama neih chu khuallian niin a hmanpui a. Assembly Thlengtu Lt. Col. Clement Lalhmingthanga, Champhai South bialtu MLA pawhin he hun hi a tel pui a ni.

Thanghlianga Sailo Runa vantlang inkhawmah hian Chief Minister chuan, Mizo Zirlai pawl te nen inzawmna thuk tak a neih thu a sawi a. 'MZP te hian Politician eiru lo berah min thlang tawh a, Mizorama Remna a awm theihna atan a thawhhlawk chawimawina min lo hlan tawh bawk. Hei hian ka nunah thu tam tak a sawi a, min tichak leh tihuai fo tu, ka theihnghilh tawh loh tur chawimawina hlu a tling a ni,' a ti.

Chief Minister hian MZP din chhoh dan sawiin, a tir phat atangin zirna chawisan kawngah te, Zofate irawm chhuak thu leh hla humhim kawngah te, Mizo hnam zia humhalh leh chawi lar kawngah te nasa takin hma a la a, mipuite pawhin ṭha takin an thlawp thin. Rambuai hun thim karah pawh MZP hian tha nasa takin a thawh. Student Joint Action Committee ang hma lain, Remna a thlen theih nana thawhhlawk ber zinga mi an ni, a ti. MZP chu vawiin thleng pawhin Zofate huikhawmtu, Zohnahthlak unaute thlavang hauhtu, chhiatna an tawh pawh a kantu leh tanpui hmasa ṭhin tu an ni. Ram leh hnam hmangaihna thinlung tuh kawngah te, zirna chawisan kawngah te, hnam zia chawilarna lamah te, inpumkhatna lamah te, ram hmasawnna lamah te pawh hma a la zui zel a. Hetianga ram leh hnam tana tha an thawh chhunzawm zel chuan mipui ten MZP an zahna leh ngaihhlutna hi a pung zel ang, a ti bawk.

Chief Minister chuan Mizo Zirlai Pawl chu ram leh hnam rawngbawlna hmun, zirlaite kawng dik zawhtir tura hmalakna hmun a ni tih hre reng turin kalkhawmte chu a chạh a, “Tu te emaw inhampuarna hmun, mimal hamṭhatna dap nana an hman mai mai in phal tur a ni lo.” tiin a fuih.

Mizoram sawrkar chuan zofate hui khawma, inpumkhatna leh ṭanrualna lama hmalak chu a thil tum pawimawh tak a nih angin, Chief Minister Office-ah Mizo Diaspora Cell din a nih thu a tarlang a. “Khawvel hmaa Zofate sang taka chawikan hi kan duh a, kan theih ang angin hma kan la ṭan a. Khawvel ram hrang hranga cheng mek Zofa ten rawn be pawp ula, a ṭul ang zelin kan ram tan i thawk tlang ang u,” a ti. Pu Lalduhoma chuan Mizoram chu zofate himna kulh, thlamuang taka Zofate chen za theihna anih angin ngaihlu tlang ila, a ṭhatna turin mahni phak tawk ṭheuh i thawk ang u, a ti a. Chi peng inhungbikna khauh lutuka kalpui hi min ṭhendarh a, min teitetu a ni tiin “Zo hnahthlak hnam hrang hrangte hian Mizo Hnam chhungah kan chi peng hi lungawi takin kalpui zawk ila. Mizo anga kan dinchhuahna turah chuan thu khat i vua ang u,” a ti.

Chief Minister chuan zỉna hi mimal, chhungkua leh hnam ang pawha inphun ngheh theihna hmanraw pawimawh a nih angin Mizoram sawrkar pawhin he mi kawngah hian hma nasa takin a la mek a. Zirna in hma a sawn theih nan, zirtirtu engemawzat lak an ni a, thingtlang lamah zirtirtute quarters tur pawh tam tham tak sak tum mek a ni, a ti a. Zirna mai ni lo, Skill Development, Entrepreneurship Development leh Sports lamah te pawh hma a la dawn a. “Kan thalai, hlawhtlin tak tak tumte hi kan thlahthlam dawn lo. An banah kan kai ang a, kawng kan kawhhmuh ang a, kan khai chhuak dawn a ni. Chu chu kan flagship scheme - Handholding pawhin a tum ber pakhat a ni,” a ti.

MZP Assembly vawi 68-na, hun hnihna hi Pu C. Lalremruata, Vice President, MZP chuan a kaihruai a. Pu Chinkhanmanga Thomte, General Secretary chuan report pein, Pu H. Lalthianghlima, President hnen atangin thu sawi ngaihthlak a ni bawk. He hunah hian Mizo Zirlai Pawl te hian Chief Minister Relief Fund-ah cheng 20,000 an chhunglut a. Chin Baptist Church, USA ten raltlan ṭanpuina cheng 150,000, Champhai District sikul hrang hrang 15 tana an pek chu Chief Minister hian MZP Headquarters, Champhai hotute hnenah a hlan a ni.