1900/2026-2027

Siaha, the 21st August, 2026: Vawiin khan Chief Minister Pu Lalduhoma chuan DC Office Complex, Siaha-ah District Pisapui Building thar chu a hawng a. He hunah hian Pu K. Hrahmo, 40-Palak (ST) AC bialtu MLA leh sawrkar hotu dangte an tel a ni.

District-a sawrkar office pawimawh ber zinga mi Deputy Commissioner’s Office building tha tak a hawng thei chu lawmawm a tih thu sawiin Chief Minister chuan, "Hei hi Siaha district tan mai ni lo, Mizoram tan pawh hmasawnna chhinchhiah tlak tak a ni," a ti. Hmun tha laili a DC Office a din theih nana zangnadawmna beisei hauh lova, mahni in leh lo sawrkar hnena pe tute chungah lawmthu a sawi bawk.

Chief Minister chuan Siaha District tihchangtlunna turin Mizoram sawrkarin hmasawnna hna nasa takin a thawk mek a ti a. Chung zinga thenkhatte chu:

Government Quarters (General Pool) - Additional DC Quarters chhunga sak mek te, Government Quarters (General Pool) - Additional DC Quarters pawna sak mek, Government Quarters (General Pool) - Additional DC Quarters (Type-III) sak mek te, Meisavaih Site-I-a Government Quarters (General Pool) (Type-III Quarters, 4 Units) sak mek te, Meisavaih Site-II-a Government Quarters (General Pool) (Type-III Quarters, 4 Units) sak mek te, Siaha-a Circuit House sak mek bakah Tipa-a SDO(C) Office & Quarters sak mek te a tel ni, a ti. Sawrkar laipui scheme hrang hranga district chhunga hna thawh mek thenkhatte pawh a tarlang bawk.

Siaha District-ah khualzinte hip thei tourist destination hmun tha tak a awm a, chung hmunhmate tihchangtlunna turin ruahmanna thahnem tak siam a ni, a ti. Chung zingah chuan KMMTTP Road to Castle of Beino kawng siamna tur atan cheng nuai 1326 leh Palak Dil kawng siamna tur atan cheng nuai 2161 dah tawh a nih thu a sawi.

Pu Lalduhoma chuan Mizoram in a hranpa-a Finance Commission a neih hnuah State sawrkar bakah ADC-te leh Local Bodies hrang hrangte sum dawn tur chu an ruahmanna angin an kal thin a, an ruahman dan bakin kal theih a ni lo, a ti. Tuna MADC-te sum indaih lohna chu pawi a tih thu sawiin, an harsatna zualpui phurh ruksak nan One Time Grant pek an tum thu a sawi a. District leh a mipuite hmasawnna turin nasa taka tan lak a pawimawh thu sawiin, MADC-ah sawrkar chak leh nghet a awm theihna turin Mizoram sawrkar ruahmanna siamte tha taka thawhpui turin a chah bawk.

Mizoram sawrkar chuan thang that lak a tum ringawt lova, ram hmasawnna leh rohlu a ngai pawimawh tiin, hmalaknate tha taka thawk zel turin department tin a chah a. Chung hnate chu tha taka thawh a nih theih nan khaw tina tlawmngai pawl leh VC-te chu enzui kawnga thawhpui turin a sawm bawk. Siaha DC Office building thar mawi tak puitlin thei tura tha thawhtute zawng zawng chungah lawmthu a sawi a. Nitina office hmangtu tur, office-a thawkte leh office dawr thin mipuite chu a lawmpui thu sawiin duhsakna a hlan nghal bawk.

Keynote address petu District Bawrhsap Pu V.L. Hruaizela Khiangte chuan building thar sak chungchangah a kul a taia duhsaktu Chief Minister hnenah lawmthu a sawi a. District headquarters hlun ber pawl kum eng emaw chen phuahchawp taka an lo khawsak tawh hnuah building tha tak an luah thei ta chu lawmawm a tih thu sawiin, district dangte ke pen ruala an pen ve theih tawh tur thu a sawi. DC Office building thar chuan a thawktute chu mipui leh ram rawngbawlna kawngah phurna nasa tak a pe dawn, a ti bawk.

Hawnna inkhawm hi Addl. DC Pu Abraham Beirazi Khithie chuan a kaihruai a, ECM ES i/c Education Rev. Chhuakhu Khithie chuan hunserh a hmang. Er. Hrangthanga Zote, Chief Engineer (B&OE) chuan technical report a pe a, Pu Vanlalchhuanliana, SDO(S) chuan lawmthu sawiin hun a khar a ni.

He DC Office Building hi NEDP atanga sak a ni a. Work order amount chu Rs. 5,09,08,023/- a ni. 31st October, 2018 khan sak tan niin 1st December, 2025 khan zawh fel a ni. Ground floor ah room 17 leh First floor-ah room 12 a awm a, a vaiin room 29 a awm a ni.