Vawiin khan Art & Culture Department leh Central YMA tangkawp in a buatsaih Joint Cultural Meet cum Bio Resources Festival-2016, A.R. Lammual-a neih chu Chief Minister Pu Lal Thanhawla’n a hmanpui.

Khuallian Pu Lal Thanhawla chuan thu sawiin, khawvel hnam fing apiangin anmahni hman zia rang (culture) chawisan a, chhawm nun leh nunpui nachang an hre thin a; hetiang kawnga Young Mizo Association (YMA), Young Lai Association (YLA) leh Mara Thyutlia Py (MTP)-ten Cultural Meet an buatsaih chu a lawmawm hle a ni, a ti a. Mizo te chu kumpinu sawrkar in then hrangin khawvel hmun hrang hrang leh India State hrang hrangah cheng mah ila, unau kan la nih vek avangin Mizoram chhunga cheng ‘in nghaktu’ te hian ‘Nu leh Pa’ chan changin, hmun hrang hranga Zo-hnahthlakte tan a belh tlak ‘Inpui’ kan siam thiam a ngai a ni, a ti a. Neitu rilru pu theuhva inpumkhat a awm chu Pathian duh dan pawh a nih a rin thu a sawi a ni.

Chief Minister chuan Joint Cultural Meet chuan Zo-hnahthlak te chu chhungkhat vek kan nih angin inngeih tak leh inpumkhat tlat a min suihkhawm chhunzawm zel tu a nih a beisei thu a sawi a. Kalkhawm zinga thalaite hnenah fuihna thu sawi bawkin, nakin lawka ram, khawtlang leh kohhran hruaitu tur te an la nih avangin nu leh pa te thu awih a, aia upate zah thiama Zo nunze mawi vawng nung zel turin a chah a ni.

Joint Cultural Meet Cum Bio-Resources Festival-ah hian Special Guest Prof. Dinabandhu Sahoo, Director, IBSD, Imphal pawhin thu sawiin, Mizoram in culture hausa tak leh Bio-resource lama theihna sang tak a neih avangin Economy leh Tourism lamah than len theihna tam tak a hmuh thu a sawi a ni. Hun hi Pu Lalhmachhuana, CYMA General Secretary chuan kaihruaiin, Art & Culture Director, MTP General Hqrs President, Central YLA President, CYMA President ten thu an sawi tel bawk a. Zai leh hnam lam hrang hrang entir in hun hman a ni.