Aizawl-a cham mek, Pu K.G Suresh, Director General, Indian Institute of Mass Communication chuan vawiin khan PIB Conference Hall Tuikhuahtlang-ah Central sorkar leh state sorkar hnuaia media lam hna thawktu te, tualchhung chanchinbumite leh IIMC Aizawl Campus Alumni member te kawmin Aizawla IIMC Regional Centre dinhmun leh he Centre a zirna kalpui chhunzawm zel tum dan te a sawi.
Pu Suresh chuan Mizoram Univdersity campus chhunga IIMC Regional Centre building leh hmunhma buatsaih mek chu nakum 2017 December ah peihfel leh hawn hman tum a ni tih a sawi a. Tuna postgraduate diploma course in English journalism kalpui mek bakah Advertising & Public Relations postgraduate diploma course leh Mizo tawnga journalism certificate course zirna te pawh siam belh tum a ni ang, a ti a. Mizoram leh hmarchhak zirlai tam zawk ten he Centre hi an chhawr tangkai theihna turin entrance exam interview pawh Aizawl hmuna tih theih tawh turin ruahmanna neih a ni a. India sorkar Act East Policy hnuaiah South East Asia ram dangte tan pawh he centre hi media training na hmunpui atan buatsaih chhoh tum a ni, a ti.
Kum 1965 a din IIMC Delhi chu India rama journalism course zirna lar leh ngaihsan ber a nih avangin ram dang sorkar te pawhin sorkar hnathawk te training na atan an rawn pan nasa a. Kum 1969 atanga tun thlengin ram 125 atangin mi 1500 chuangin journalism leh media kaihnawih training an rawn nei tawh a. IIMC hian Regional Centre 6 neiin Aizawl hi hmarchhak a IIMC Centre awm chhun a ni a. Tuna PG diploma course in English journalism zirna kalpui mek ah hian he Centre atanga zir chhuakte chuan sorkar leh company hrang hrangah hna tha tak an hmu vek a ni.
