No.3286/2021-2022

Aizawl the 6th December, 2021 : Vawiin khan Mizoram Chief Minister Pu Zoramthanga chuan chanchinthar lakhawmtute CM Conference Hall-ah kokhawmin, ni 19.11.2021 atanga 03.12.2021 inkara Delhi a zin chhungin sawrkar laipuia mi pawimawh tam takte hmuin Mizoram mamawhte a thlen thu leh a hnathawh tlangpuite chu a tarlang :

Chief Minister Pu Zoramthanga chuan Prime Minister Pu Narendra Modi hmuin a hnenah Mizoram tana All India Service Cadre hrang siam thu te, Chief Secretary Mizo tawng thiam ruat thu te, Bamboo Link Road thu te, Returnee te insak tanpuia thu te, Myanmar raltlan tanpuia tur te leh Myanmar, Bangladesh leh North East Politics boruak thute a sawipui a. Prime Minister chuan a theih ang angin a lo enzuipui tur thu leh tihsak a tum tur thu a lo hrilh a, boruak tha leh hahdam tak hnuaiah inkawmna tha tak an nei a ni.

Chief Minister Pu Zoramthanga chuan Assam Chief Minister nen pawh inkawmna tha tak an an neih hnuin, a hnuah Union Home Minister Amit Shah-a nen an pathumin inkawmna an nei leh a. Assam leh Mizoram ramrite sawihoa chin fel dan tur zawngin State pahnihte aiawh leh Chief Minister-te pawh inbiain boruak muanawm tak siama engkim siam fel tum turin hmalak nise an ti a. Myanmar, Bangladesh leh North East boruak tlangpui chungchangah pawh sawihona tha tak an nei bawk.

New Delhi-ah a cham chhungin, Chief Minister Pu Zoramthanga chuan Union Finance Minister Pi Nirmala Sitharaman nen sum harsatna dinhmun an sawi dun a. A ni hian a theihtawpa lo puih a tum thu leh Bamboo Link Road pawh a bul tanna atan Crore 100 man DPR rawn siam phawt turin a lo ti bawk.

Chief Minister Pu Zoramthanga chuan Union UD&PA Minister Pu Hardeep Singh Puri pawh hmuin Vaivakawn, Bawngkawn leh Chaltlang Bus Terminal atan Principle Approval leh Feasibility Report te pawm tawh a nih avangin DPR buatsaih nghalna tur pawisa an rawn sanction nghal tur thu a lo hrilh bawk.

Central Minister dang Pu G. Kishan Reddy (DoNER) te, Pu Jitender Singh te bakah NSA Pu Ajit Doval te, Secretary pawimawh zual Home Secretary, Foreign Secretary, Finance Secretary leh CBI Director te kawmin thil pawimawh tam tak a sawipui bawk a ni.