No.3285/2021-2022
Aizawl, 6th December, 2021 : Mizoram Merchant Association (MIMA) Office building thar, Aizawl New Market-a mi chu tukin dar 8:00 khan Dr. R Lalthangliana, Hon'ble Minister, Commerce & Industry chuan a hawng.

He huna khuallian Dr.R.Lalthangliana chuan hawnna thusawiin, tun hma a helai hmun bawlhhlawh leh tawp tak ni thin MIMA-ten thianghlim leh felfai taka an lo siam ta chu lawmawm a tih thu a sawi a. Covid donaah pawh MIMA-te nen an thawhhona a that thu te sawiin, heng lai Bazar Area hi Mizoramah chuan kan market lian ber a nih avangin sorkar pawhin a ngai pawimawh hle a ni, a ti.

Dr. Thangtea chuan, "Helai hmunah hian tuna cheng vbc 36 hmanga ruahmanna kal pui mek bakah, Smart City Project cheng vbc 34 man tur ruahmanna dang a kal mek bawk tih a sawi a, helai vel atan hian cheng vbc 70 project kan nei a ni, a ti a. Civil Hospital, Aizawl tawt lutuk turte pawh khi siam rem dan kan ruahman mek a, Trauma Centre atan ruahman felfai tak kan nei tawh a. Civil Hospital tlak lam pang liam, hmun ruak pawh khi, Doctor leh Nurse-te quarter awmna tur mumal takin DPR kan siam mek bawk a ni a ti.

Sumdawng pawl baka downline ngah hi Mizoramah an awm lo tih sawiin, an inzar pharh zau a, mutia atanga dawr lian ber thlengin a huam vek a ni a ti a. Ramri chungchangah leh tax chungchangah an hmalak tawhnate a ropui a tih thu sawiin, an hmalak mekna leh kal zelna turah duhsakna tinreng a hlan bawk a ni.

Khualzahawm bialtu MLA Pu Robert Romawia Royte, Hon'ble Minister pawhin a bial chhung ngeiah MIMA office changtlung tak hawn a ni chu lawmawm a tih thu a sawi a. Sumdawng tamna area-ah office changtlung tak a in hung hi a lawmawm ka ti hle a ni, a ti. Commerce & Industries Minister-in sumdawng pawlte hmakhaw ngaia he lai hmun takah office tha tak din theih a ni ta hi a lawmawm a tih thu a sawi bawk a ni. Sumdawnna hi ram hmasawnna khalhtu a ni ber a. Hnam changkang sociey-ah sumdawng an tam a, ram changkang a piangah sumdawng dinhmun a sang a. Mizoramah pawh MIMA te hnathawh hi Zoram hmasawn nan a pawimawh hle a ni a ti. Mizote hi mahni ram chhungah chauh ni lo, state dangah pawh kan sumdawng thei a, sumdawng pawlte hian Lanngkaih leh Tiau kar ringawt ngaihtuah lovin, ram ril zawkah hak i zauh zel ang u, a ti bawk.

He hun hi Pu Lalrintluanga Sailo, MLA Dy.Govt.Chief Whip pawhin a hman pui a, Commerce & Industry Addl.Director Pu HD.Lalrintluanga pawhin department hmalakna hrang hrang leh sumdawng pawlte hmasawn theih dan tur kawng a sawi.

He hun hi Pu PC Laldinthara, President MIMA chuan a kaihruai a, hunserh chu Upa Zodingliana, Dawrpui chuan a hmang. Report hrang hrang chu Pu Lalramsanga Sailo, General Secretary, MIMA chuan a pe bawk.

Pu H Malsawma, Sr. Vice President, MIMA chuan lawmthusawiin hun a khar.