2978/2023-2024

Dated Aizawl,the 8th December, 2023: Chief Minister atana lakluh a nih zawhin Mizoram Chief Minister thar Pu Lalduhoma chuan Raj Bhavan atangin Sakawrtuichhuna Tawngtai Bethel Camping Centre (TBCC) a pan nghal a, he Camping Centre enkawltute leh damlo enkawl lai mi 860 te chuan chhung inkhawm an lo buatsaih sak.

He inkhawmah hian Chief Minister chuan, kan sawrkar huna tihtur pawimawh kan duante zinga pakhat chu 'ram rorelnaah Pathian ram lo thleng rawh se' tih a ni a. He Pathian lal ram lo thleng tur lo dipdaltu lian tak pakhat chu ruihhlo hi a ni. Thalai leh pavalai thihna kan ramin a tuar nasa em em mai a, a chhan lian ber chu zu leh ruihhlo a ni. Vawiinah Chief Minister atana lakluh ka nih hnua mahni in pawh tlawh lova he hmun ka tlawh chhan chu he Centre leh a anpui kan rama inenkawlnate kan ngaipawimawh vang a ni a, zu leh ruihhlo laka kan thalaite humhim an nih theih nan sawrkar chuan theihtawp a chhuah dawn a, ruahmanna tha tak a siam thuai dawn a ni, tiin an centre a tlawh chhan a hrilh a. Kan Home te, Jail te leh Centre hrang hrangte hi sual laka fihlim nan chauhva hmang lova kan fihlim tawh hnua eizawnna leh thiamna hlu tak tak hmuh theihna hmun atana buatsaih a pawimawh thu pawh a tarlang a. Ruihhlo lakah fihlim mahila engmah thawh tur leh tih tur neih zui si loh chuan ruihhlo ah bawk khan tluk leh a awl em em a ni. Chuvang chuan Centre a thawktute leh sawrkar kan tang ho zel ang a, mamawh leh tul awmte pawh inhrilh hreh lo ila, hma lam i pan zel ang u, tiin a sawm a. Damlo awm mekte chu mi ropui nih tum turin ka beisei lo che u a, mi pangai, mite tih ang ti a, mite nih ang ni ve thei, mite nun dan pangai anga nung ve thei tura a beisei tlat thu a chah a, Krismas leh kumthar hlim taka hmang turin duhsakna a hlan a ni.

Inkhawm hi TBCC dintu Pu T.T Zohmingthanga'n a kaihruai a, Chief Minister tharin lakluh anih hnu lawka a tlawh nghal avangin lawmthu a sawi a, kan tan chuan theihnghilh theih tawh loh tur ni chhinchhiah tlak a ni, a ti. He Centre hian kum 19 kan pum lek lek tawh a Chief Minister meuhvin min rawn tlawh hi a vang hle a, Ruihhlo vanga thalai harsatna tawk mekte min chhanchhuah duhtu Chief Minister kan nei tih a chiang a, a thlamuanthlak hle a ni, tiin lawmthu a sawi a ni.

TBCC ah hian a dintu Pu T.T Zohmingthanga leh a nupui pi K. L Hmangaihzuali bakah thawktu mipa pakhat leh hmeichhia pakhat an awm a. Tunah hian ruihhlo vanga harsatna tawk damlo mi 860 an enkawl mek a ni. Chief Minister thar lawm nan damlo awm zawng zawngte hian "Ro min rel sak ang che" tih hla chu an sa a ni.

Chief Minister hi Pu K.T Beicho, IRAS, Principal Secretary, Social Welfare & Tribal Affairs leh Dr. Lalhriatzuali Ralte, IAS, Director, Social Welfare & Tribal Affairs ten an tawiawm a, Director hian inhmelhriattirna thu a sawi bakah Chief Minister in a tlawh denchhenin Centre tanpuina thilpek, pawisa fai cheng singnga a hlan a ni.