2977/2023-2024

Khawzawl 8th. December, 2023 : District Horticulture Office, Khawzawl District bultumin vawiin chawhma dar 11:00 khan Horticulture Department Farmers Training Hall, Khawzawl Dinthar vengah Horticulture Fair-cum-Exhibition buatsaih a ni a, hetah hian Pangpar, Thei leh Thlai-ah te intihsiakna neih a ni bakah loneitute thar chhuah thlai leh thei te man tlawm zawkin hralh chhuah a ni.

Vawiin Fair hi Khawzawl DAO Pu Vanlalruata Hnamte in a hawng a, DAO chuan Horticulture Department, Khawzawlin Fair-cum-Exhibition an buatsaih thei chu lawmawm a tih thu leh hei hian pangpar chingtute leh loneitute tan phurna nasa zawk a siamsak a beisei tih a sawi a ni. Fair hawn hnu hian Judge 3 - DAO Pu Vanlalruata Hnamte, KVK Sr. Scientist & Head Dr. Malsawmkimi leh ADHO Pu Peter Lalramhluna ten Pangpar, thlai leh thei phochhuah te chu an endik zui nghal a. Endikna neih zawh hnu, chawhnu dar 2:30 khan DHO Pu Lalnunpuia chuan lawmthu sawina neiin lawmman a sem zui nghal a, intihsiakna Category hrang hranga a ti tha zual thlan chhuah mi 3 te tan lawmman buatsaih a nih bakah a tel zawng zawng te hnenah Participation Prize an pe a ni.

Vawiina Horticulture Fair cum Exhibition buatsaihah hian Flower Show-ah mi 48, Fruits/Thei-ah mi 7, thlai-ah mi 24, an vaiin mi 79 an tel thei a ni.