2976/2023-2024

Aizawl, the 8th December, 2023: Mizoram Consumers' Union (MCU) Annual General Meeting (AGM) 2023, a vawi 26-na chu vawiin khan Central YMA Hall, Tuikhuahtlangah neih a ni a. MCU Annual General Meeting 2023 hi Information & Public Relations (I&PR) Minister Dr. Vanlalthlana, Adviser, MCU Hqrs. chuan a hmanpui a ni.

I&PR Minister Dr. Vanlalthlana chuan Mizoram Consumers' Union, Annual General Meeting vawi 26-na hmangtute chibai bukin Consumer Union chu mipuite dikna leh chanvo humhalha venghimtu a ni, a ti a. MCU ah theihtawp chhuaha a lo tel thin tawh thu leh Annual General Meeting-ahte a lo tel ve thin tawh thute a tarlang a. MCU chu Consumer-te tana thawk zel tura fuihin, Headquarters leh Branch tinte chu an pawimawh dan a inchen vek thu a sawi a. LPG Home Delivery kalpui a nih theih nana theihtawp chhuaha hma a lo lak tawh thu leh Assembly House-ah a auchhuahpui thu sawiin, MCU hmalaknate a tul anga thlawp zel a tum thu a sawi a. Vawiina hnathawh hi kan hmalam huna Zofate tana kawng kan sialna a ni tih hre reng tura kalkhawmte chahin, Consumer-te dikna leh chanvo humhim nana theihtawp chhuahpuiah a sawm nghal bawk.

Thusawitu dang Pu Lalmuansanga Ralte, Jt. Director (Adm), Food, Civil Supplies & Consumer Affairs (FCS&CA) chuan Consumer Forum leh Activist-te chu mipui nawlpui tana ding, an dikna chanvo humhalhsaktu tura din a nih thu a sawi a. Mizoram dung tluanah consumer rights awareness hi kan nei tha ve thawkhat tawh a, mahse hriatna ringawt chuan cosumer rights kenkawh kawngah hmasawnna duh angin min la thlen tawk lo a, consumer-te an lo huaisen zual zel theih nan consumer activist-te hian theih tawp kan chhuah a ngai a ni, a ti a. Mipuite tana Consumer rights kenkawh kawngah erawh Mizo kan nih anga hawihhawm tak leh Dan zawm chunga kal thiam a ngaih thu sawiin, hetianga hmalak hi a Mizo a, khua leh tui tha kan nihna lantirna a ni, a ti bawk.

MCU Annual General Meeting hi Pu Thanglura, Vice President, MCU Hqrs. chuan kaihruaiin Lt. Col. Khaizadinga, Chanmari West MCU Branch-in hunserh a hmang a. MCU Hqrs. President Prof. Chawngsailova'n kalkhawmte lawmna thu a sawi a. Gen. Secretary Pu A. Lalhmangaihzuala leh Treasurer Pu H. Laldikliana te hnen atangin report ngaihthlak a ni a. Dr. Lalthansangi, Interim President, State Commission, Consumer Disputes Redressal Commission, Mizoram leh Pu Vanlalmawia, President, District Commission, Consumer Disputes Redressal Commission, Aizawl-ten thu an sawi bawk a. Pu C.Laldawngliana, Vice President, MCU Hqrs. in lawmthu sawiin chawhma program a khar a ni.

Chawhnu lamah MCU Hqrs. President Prof. Chawngsailova kaihhruaiin rorel inkhawm neih a ni a. Pu C.Engliana, Secretary i/c Information & Publicity, MCU Hqrs. in lawmthu sawiin MCU Annual General Meeting a khar a ni.