No.7844/2020-2021

Aizawl,  19th March, 2021 : Vawiin khan Chief Minister Pu Zoramthanga tirhin Mizoram MP te 2, Pu C.Lalrosanga leh Pu K. Vanlalvena te bakah State Planning Board Vice Chairman Pu H.Rammawi leh MNF Adviser Pu Rosangzuala ten Union Minister of State for Home Nityanand Rai chu a pisa ah hmu in  Mizorama Myanmar Refugee rawn lutte chungchang leh Aizawl khawpui laili atanga Assam Rifles te Zokhawsanga an insawn dan tur chungchanga   thil pawimawh te an sawipui a.

Minister hnenah hian sipai sawrkar tihduhdahna avanga harsatna nasa tak tuar mek Myanmar mipuite tanpui tura tun aia nasa zawka India sawrkar a chet a tul thu thlenin India rama raltlan rawn lut te pawh thawn haw rih lova a tul dan ang zela lo chhawmdawl turin India sawrkar an beisein an ngen a. Democracy namthluk a nih avanga buaina leh Democracy tungding leh tura beihna hi tun aia chak zawka thlawp a tul tih Home Minister hnenah hian an thlen a ni.

Aizawl khawpui laili atanga Assam Rifles te sawn chhuahna tur Zokhawsang pawh engkim peih fel a nih tawh thu hrilhin an insawnna tur programme siam tawh turin Home Minister hnenah hian an thlen bawk a ni.

Chief Minister tirh mi pawimawh te hian nimin 18th March, 2021 khan Union Home Secretary Ajay Kumar Bhalla IAS chu a pisaah an lo hmu tawh bawk a. Union Minister of State for Home leh Home Secretary te hian Mizoram aiawha anmahni dawrtu Mizoram MP te leh Planning Board Vice Chairman leh MNF President Adviser te thu thlen chu an ngai pawihmawhin tih hlawhtlin ngei an tum thu pawh an lo hrilh a ni.