No.7845/2020-2021
Aizawl, 19th March, 2021 : Chief Secretary Pu Lalnunmawia Chuaungo chuan vawiin khan Federation of Mizoram Government Employees & Workers (FMGE&W) General Conference vawi 31-na Vanapa Hall-ah a hmanpui.
"Mizoram hmasawnna chahbi kawltu chu sawrkar hnathawkte in ni" tiin Chief Secretary Pu lalnunmawia Chuaungo chuan FMGE&W member te chu mipuite rawngbawltu 'public servant' an ni tih hre reng turin a chah a, sawrkar inrelbawlna kalphung pawh hun inthlak danglam mil zela her rem a tul thin a, tun aia awmze nei leh tangkai zawka hnathawh a nih theih nan system reforms kalpui a tulin hriat a ni a, rawtna hrang hrangte chhawpchhuah a lo ni tawh a, heng bakah hian thildang pawimawh leh tangkai, Mizoram leh a chhunga cheng ten hma kan sawn pui theih tur chi hrang hrang atan rilru leh ngaihtuahna seng turin ka chah duh che u a ni, a ti.
Pu Lalnunmawia Chuaungo chuan COVID-19 dona kawnga sawrkar hnathawkte hmalakna leh inpeknaah lawmthu sawiin, Tlawmngai pawl hrang hrangte leh kohhranhote nena COVID-19 dona kawnga kan thawhho dan hi India ram hmun dangah a tih ve theih loh a, thawhhona tha siam tura kan tan tlannaah lawmthu ka sawi a ni, a ti bawk.
Er. Vanlaltlana, President in programme hi a kaihruai a, Pu R. Lalrammawia, Secretary General-in report a pe a. FMGE&W hruaitu hlun pension a chhuak ta pahnih Pu Ramhmangaiha Ralte leh Er. K. Lalsawmvela te hnenah chawimawina thilpek hlan a ni a, anni pahnih hi FMGE&W Adviser atan ruat an ni bawk a ni.
MJA te kaihhruainain kum 2021 - 2023 chhunga hruaitu tur mi 10 thlanna neih nghal a ni a. Heng mite hi thlanchhuah an ni (an thawhna department nen) :
1) Pi Laltleipuii, Fisheries
2) Pu R. Lalrammawia, Transport
3) Pu C. Lalrosanga, Land Revenue & Settlement
4) Pu J. Ramdinmawia, Economics & Statistics
5) Pu Lalchuailova, Art & Culture
6) Pu Lalremsanga Khiangte, Home
7) Pu C. Lalnunzira, Sericulture
8) Er. Vanlaltlana, Power & Electricity
9) Pu F. Lalthanmawia, Art & Culture
10) Pu Hmingchungnunga, School Education
Chawhnu lamah rorel leh Finance report te ngaihthlak a ni a. Agenda pawimawh tak tak rel ho a ni.
FMGE&W hi November ni 24, 1973 a din niin kum 46 chuang a ni tawh a. Service Association hrang hrang 93 awmin Sub-Hqrs. 7 neih a ni bawk a. FMGE&W General Conference vawi 31-na hi kum 2020 a neih tur niin vanduaithlak taka COVID-19 hripui a len vangin a hun hi sawn a ngai a, vawiin March ni 19, 2021 hian neih a ni ta a ni.
