Ni 4 chhung Hnahthial leh Serchhip Bial chhung tlawha zin Chief Minister Pu Lal Thanhawla chu nimin khan dam takin Aizawl lo hawng leh ta. Thawhtanni kal ta April ni 4 khan Hnahthial-ah vantlang inkhawm hmaah thu sawiin Chief Minister chuan Mizoram sorkarin hmasawnna kawng hrang hranga hma a lak dan leh a hmachhawp nei mek te sawiin mipui tawiawm turin a sawm a ni. Thawhleh Ni khan Hnahthial-ah Party hruaitute inkhawm Chief Minister hian a neihpui bawk.

Nilaini April ni 6 tlai lam khan Chief Minister hian Thenzawl lutin Tourism Department-in Tourist Lodge Annexe cheng nuai 51.7 senga an peihfel tak chu a hawng a. Tourism Minister Pu S.Hiato, LAD Minister Pu P.C.Lalthanliana, Parliamentary Secretary Pu H.Zothangliana leh Serlui MLA Pu K.Lalrinthanga, LADC CEM Pu Ngunlianchunga te bakah Serchhip District D.C. Pu H.Darzika leh mi pawimawh dang engemawzatin an tawiawm a ni. Tourist Lodge Annexe hawnna thuchah a sawiah Chief Minister chuan Tourism Industry chak taka Mizoram sorkarin kalpui a tumna ah hian in tha leh kawng mampui pui ai mahin Mizo nunze mawi leh nunphung te hi pholan thiam a tul zawk fo vang a ti. Thenzawl chu kalpawh remchang a nih avangin cheibawl an tum thu a sawi a, amaherawhchu cheibawl tlak tura an inbuatsaih erawh a pawimawh ang tiin Golf khelna hmun pawh buatsaih hial an tum thu Pu Lal Thanhawla hian a sawi a ni.

Ningani April ni 7 khan Thenzawl-ah State Bank of India Branch 26-na leh ATM 28-na chu Chief Minister hian a hawng nghal a. Bank hawnna inkhawm Thenzawl Jt. YMA Hall-a neihah hian thu sawiin Pu Lal Thanhawla chuan Bank hi mi hausa leh sumdawngte tan chauh ni lovin mi rethei te tan hlei hlei thil chhenfakawm a ni, a ti a. A chhawr tangkaitute tan chuan Bank hi thian tha a tling a, amaherawhchu Bank atanga sum puk thin ten a rulh leh lamah an rinawm hle a tul a ni tiin sum reng reng hi zawn chhuah chi ni lovin thawhchhuah chi zawk a nih avangin lakluh mila hmanral pawh thiam a tul a ni, a ti. Thenzawl cheibawl chungchang a sawinaah Chief Minister chuan thil pawimawh chi hrang hrang NIT Campus te, sangha vulhna hmun changtlung zawk te bun tum a ni a, a khaw mipuiten ramruak an phal phawt chuan heng hmasawnna hrang hrang ruangam bun chu sorkar thil tum a ni a ti. Ram leh hnam chhe lai siam tha tur hian kohchhuah vek kan ni a, tumah ralbang tur kan awm chuang lo Chief Minister chuan a ti.

He inkhawma thusawitu dang Tourism Minister Pu S.Hiato chuan Mizote hi sum hmang thiam lo tak kan nih avangin him taka sum dahna hmun Thenzawlah SBI-in a hawng ta chu helai mipui ten an chhawr tangkai a beisei thu a sawi. LAD Minister Pu P.C.Lalthanliana pawhin Thenzawl mipuite SBI Branch an neih tak avanga lawmpui thu hrilhin vawi leh khata sum tam tham dah luh chu thil awlai a nih loh avangin tlem lua awm lova sum khawl zir chu chhungkaw tin hamthatna tur a ni zawk, a ti bawk.

He hun rawn chhimtu Pu Bhashkar J. Sharma, SBI General Manager (NW-II), NE Circle, Guwahati chuan Mizoramah SBI-in 1971 ah bul a tan dan te, tun dinhmunah District tinah Branch engemawzat an neih tawh thu te, SBI hmalaknaa Mizoram sorkar hotulute tawiawmna an dawn thin dan te tarlangin rampumah mihring 2000 chin chenna khua apiangah Branch hawn zel SBI chuan a tum thu te a tarlang a ni.

Thenzawl Branch hawn nia account siam zawng zawngte hnenah cheque book leh ATM Card nung sa pek nghal vek an ni.