'Sorkar tha nei turin sorkar hnathawk thiam, mahni hna a tui mi an pawimawh' Chief Minister Pu Lal Thanhawla chuan a ti. He thu hi tukina New Scretariat Complex a Administrative Training Institute (ATI) Auditorium building leh Training of Senior & Top Level Officials on 'Office Management & Administration, April 8 - 19, 2011' a hawnnaa a sawi a ni.

Chief Minister chuan ATI chu hniamtein kum 1983 a bul tana,  nasa taka lo thang chhovin sorkar hnathawkte pawhin an tangkai chhohpui hle a ni tiin, auditorium thar  nei theia a awm ta chu lawmawm atih thu a sawi a. Sorkar hnathawk hotu kalkhawmte chu an training neihna tur hmun leh training petu turte avanga trainingah tlawma la lo turin a fuih a. Sorkara thurawn petu leh kaihruaitu an nih angin an hnaa hriat tur tul leh an thiamna tibelhchhahtu anih ngei theih nan tan la turin a chah a. Chief Minister chuan sorkarah thuruk vawn,confidential a awmlo lutuk chu pawi atih thu sawilangin, hnam ang pawhin rinawm lohna a kawk thei a ni a ti a. Chuvangin kan zavai hian a chhelai siam tha tu tur kan ni a ti. Sorkar hnathawk ten kan hlawh leh kan thawhte a inmil em tih chhut thin pawimawh atih thu a sawi bawk a. Central sorkara fund tam tak haichhuah tur awmte chu kan DPR siamte a that tawk thin loh avangin kan hmuh tur kan hmuh thin loh thu sawilangin tan lak a tul thu a sawi a. Kan theihna leh thiamnate hmantlaka chherchhuah - capacity building- lam te sorkar chuan uar chhoh zel a tum ani a ti. 

Chief Secretary Pu Vanhela Pachuau pawhin thuhma sawiin, kan hnathawhna a min tichaktu anih avangin training hi a pawimawh a, zir hnem lutuk a awm theilo a ni a ti a. Training-ah hian asang zawk leh a hniam zawk tih rilru awmlova training ngaipawimawh vek turin senior officials te chu a chah a. An training tur chu ngun taka ngaithla a, inpawlhona lam hawi zawnga (interactive) kalpui a, an nitin hnathawh nena hmang thiam turin a chah a ni.

ATI building hi kum 2007 a zawh tawh a ni a, amaherawhchu siam that ngai tam tak a awm avangin kum 2008 khan luahluh chauh a ni a. Auditorium bik hi chu a thuamthatna te, a thutphah seat te, lighting leh sound lam te siam nan sorkarin a tahtawl deuha a pek avangin hawn theih lawk a nilo a ni.

Training nei tur senior official te hi an kal tha hle a. Sorkar hotu lam atangin Ministers Pu Lalsawta, Pu S.Hiato leh Pu NK Chakma te leh Pu H.Zothangliana, Parliamentary Secretary te an tel bawk a ni.