Chief Minister Pu Lal Thanhawla chuan vawiin khan MULCO Complex, Thuampui-ah NLUP Infrastructure Fund atanga bawnghnute sawngbawlna siam tur, Indigeneous Milk Product Manufacturing Plant lungphum a phum.

Chief Minister chuan MULCO in hmasawnna rahbi thar a hmuh hi kuthnawthawktu, bawng vulhtute thawhrimna rah a ni, a ti a. NLUP hnuaia bawng vulh thlangtu ten a tir lamah harsatna an tawk chungin an thawhrimna avangin MULCO in hralh sen loh bawnghnute an dawng a, bawnghnute ngau ngau bakah thil dang chi hrang hrang siamna tur siam a rawn ni chho tur chu MULCO tan mai nilo, Mizoram pum tan malsawmna a ni a. Bawnghnute hi mihringte tan a that em avangin a dehchhuah tam leh tam lohah vantlang hriselna that dan tehfunga hman thin a nih thu a sawi a. NLUP hnuaia bawng vulh thlang tute chu district hqrs. a chenglo, hmun penhleh deuha awmte chuan a chaw chungchangah leh a vulh thuah an zolo deuh a hriat thu a sawi a. MULCO leh bawng vulhtute chu inngheng riala kal chho tur an ni, a ti.

Khualzahawm NLUP Nodal Minister Pu H.Liansailova chuan AH&Vety hnuaia NLUP kalpuinaah a tir lama harsatna nasa tak an tawk chungin beidawngloin an kalpui a, tunah chuan malsawmnain min hmuak mek a ni, a ti a. Bawng vulhtute chu tan la sauh sauh turin a fuih a ni.

Khualzahawm dang AH&Vety Minister Pu NK Chakma chuan a department enkawlin NLUP avangin hmasawnna tam tak a hmu mek a ni, a ti a, AH&Vety hnuaia NLUP 1st Phase chu hlen a ni tawh a ni a ti.

Bawnghnute sawngbawlna tur hi NLUP Infrastructure Fund atanga Rs.36,86,20,402/- senga sak tur a ni a. Nitin bawnghnute 5000 litres atangin thil chi hrang hrang flavoured milk, sterilised flavoured milk, dahi (dawi’h), lassi, ghee leh paneer te siam thin a ni ang a. NLUP hnuaia bawng vulh thlangtu ten man man zawka bawnghnute an hralh theihna tur a ni.

He project hi MULCO enkawl tur a ni a, hnathawktute hlawh pawh a tum anga, technical staffte chu Gujarata MIT Meshana ah training tir an dawn bawk a ni.Civil construction leh khawl bun leh commissioning te chu India hmarchhaka tawnhriat ngak tak S.S. Service Ltd. in a tahtawlin an thawk ang a, kum 2013-2014 chhunga zawh hman beisei a ni.

Lungphum phumna inkhawmah hian Parliamentary Secretary Lt Col (Rtd) Z.S.Zuala, KVI Board Chairman Pu K.Lianzuala leh Law Commission Chairman Pu R.Lalrinawma ten Chief Minister hi an tawiawm bawk a, Pu P.L.Thanga, Vice Chairman, NLUP Implementing Board in lawmna thuchah a sawi bawk a ni.