India-Thailand-Cambodia ten in sumdawn tawnna tha zawk an neih theihna turin ICC buatsaihin ni 12.6.2013 atanga 18.6.2013 chhung khan Thailand leh Cambodia ram a DoNER Minister Pabhan Singh Ghatawar kaihhruaiin India ram aiawh North East State hrang hrang Minister te leh Thailand, Cambodia hotute’n Meeting pawimawh tak tak an nei.
Meeting-ah hian Mizoram aiawhtu Minister Pu S. Hiato chuan Mizoram chu India ram State zinga ralmuang ber, sumdawnna atana duhthusam a nih thu sawiin, Thailand leh Cambodia ram hotute chu Multi Modal Project zawh a nih hun chuan Mizoram kaltlanga India nen kawng hrang hrang ah insumdawn tawnna an kalpui theih tur thu a sawi a. Mizoram chuan India leh Foreign Investor te lo dawngsawng turin a in buatsaih mek tih sawiin, Mizoram chu reilote ah NLUP hmanga kan intodelh dawn avangin Mizoram chu rawn tlawh a, sumdawnna kawng zawng turin a sawm. Minister Pu S. Hiato chuan Mizoram chu ram la tlawh pawh tam loh, sik leh sa duhthusam awmna hmun, Tourist te tana tlawh chakawm tak a nih thu sawiin, palai kalkhawm te chu Mizoram danglam bik zia a taka hmu ve ngei turin a sawm a ni.
Minister Pu S Hiato chuan DoNER Minister Pu Pabhan Singh Ghatawar leh Secreatry U.K. Sangma IAS te chu uluk taka kawm in, Mizoram Project hrang hrang te an ngaih pawimawh thin avangin lawmthu a hrilh a, Mizoram chu State hmasawn mek anih avangin an dinhmun hrethiam a tanpui turin a ngen bawk.
Minister Pu S. Hiato chuan Mizorama District upa ber zinga mi Saiha in tun thlenga Civil Hospital tha an la nei thei lo chu pawi a tih thu sawiin, theihtawp a hma lak sak turin DoNER Minister leh Secretary te hi a ngen a. DoNER Minister leh Secretary chuan a ngenna ngaipawimawhin kumin chhung ngeia Sanction a tiam a ni.
