Chief Minister Pu Lal Thanhawla chuan vawiin khan I&PR Conference hallah danin a phalloh sikret Mizorama lo lut umbona tura beihpui thlakna ‘Joint Operation on Illegal Tobacco Products (Contraband Cigarettes)’ Kick Off Programme a hawng.

Chief Minister chuan kan hriselna leh kan sum leh pai dinhmun tichhetu, dan phalloha sikret Mizorama lo lut a huhoa umbona tur programme buatsaih a ni chu a lawmawm hle a ni a ti a. Pipute atangin meizial zuk hi thosi leh rannung umbo nan kan ching thin a, mahse ringtu kan nih angin meizial zuk that lohzia hre ber tur kan nih laiin a ching uar ber kan ni hi a pawi hle a ni a ti a. Kan thenawm ram Myanmar hi alo zalen chhoh takah hian India hian a hausakna hi hlawkpui se a duhthu sawiin, insumdawn tawnnaah pawh dan phalloh bungrua, sikret thlengin tam tak a rawn inzep tel ngei dawn a, hei hi engtinnge kan lo hmachhawn anga kan lo inpuahchah ang tih ngaihtuah angai hle a ni a ti a. Economic offence hi tang tlanga do tur a ni a, hlauh thama kan thawh tlan angai a ni a ti.

Indian Society on Tobacco & Health Mizoram Chapter President Pi Lal Riliani pawhin thusawiin Mizoramah vaihlo leh a kaihhnawih hmang 67% kan awm thu sawiin, vaihlo ah hian chemical thalo chi tam tak a awm a, 80% vel hi cancer thlen thei a ni a ti a. Vaihlo in mihring hriselna a khawih chhiat theihzia, abikin cancer a siam nasatzia uar takin a sawi a. Sikret hi a tlawna zawrh nikum 2015 September khan Chief Ministerin a puan tawh thu a sawilang bawk a ni.

Pu Lalthianghlima Pachuau, DGP chuan sikret hlauawmzia hi sunday schoolah te hial sawi tha a tih thu a sawi bawk a. Pu Lallianmawia, SP,CID (Crime) pawhin thusawiin CID (Crime) hnuaia ‘Economic Offence Wing’in Myanmar atanga sikret lolut an man thin thu a sawi a, heng sikret lo lut 80% vel hi Aizawlah tihral thin a ni a ti a. Anti Tobacco Squad hmalakna avangin sikret lo lut hi nasa taka a tlak hniam thu a tarlang bawk a ni.

Taxation leh Legal Metrology aiawhten thu sawi bawkin, The Legal Metrology (Packaged Commodities) Rules, 2011 tlawhchhana heng sikret lo lutte hi man theih anih thu leh a neitu pawh hrem theih an nih thu an sawi a. Taxation department chuan heng bungrua te atanga chhiah lak theih anih loh avangin sorkarin sum tam tak a hloh phah tih an tarlang a, India siam sikret atanga chhiah hmuh chu kumtin a pun chhoh zel thu sawiin, kum 2015-16 chhungin Rs.1426 Lakhs hmuh niin, hei hi chhiah hmuh zawng zawng atanga chhutin 5.70% a tling a ni an ti.

Mizoram State Tobacco Control Society (MSTCS) Nodal Officer Dr.Jane R.Ralte chuan powerpoint hmangin COPTA, 2003 section 7, sikret kawma sikret zuk vanga cancer vei thlalak langsar taka tihlan danin a phut thu a sawifiah bawk a ni.

Joint Operation hi MSTCS, Police, Legal Metrology leh Taxation department te tang tlang ina hmalak tur a ni.

Kick off programme hi Pu R.Lalramnghaka, Director, FCS&CA leh ex-officio Controller, Legal Metrology in a kaihruai a, chawhnu lamah Dr.Jane R. Ralte kaihhruaina hnuaiah sawihona hun hman chhunzawm a ni.