Champhai DC Pu Vanlalngaihsaka chuan Inrinni (30.4.2016) atang nimin (2.4.2016) thleng khan Ngopa RD Block leh Champhai RD Block chhunga BADP hnuaia hmalakna hrang hrangte enfiahin a kal a. Khawtlang hruaitute nen inkawmna hun a hmang bawk.

DC hian Ngopa RD Block chhunga khaw panga - Khawkawn, NE Khawdungsei, Chiahpui, Ngopa leh Kawlbem a 2014-15 leh 2015-16 chhunga BADP hnuaia hmalakna kal mek leh thawh zawhte a enfiah a. Khawkawn ah Community Hall renovation hna kalpui mek a ni a; Chiahpui ah High School leh PES School building bakah Tennis Court sak zawh tawh niin, Primary School building sak leh Flexible Water Tank siam hna chu kalpui mek a ni a.

NE. Khawdungsei ah Higher Secondary School Building sak mek anih bakah Community Hall renovatiom hna kalpui niin; Ngopa khuaah chuan MUP building sak mek tih loh chu Jubillee Hall renovate-te, ICDS office panna Stone Masonry pavement road leh 39th Assam Rifles panna kawng black topping siam te chu thawh zawh tawh a ni. Bawrhsap hian Kawlbem a 39th Assam Rifles (helipad) panna kawng boulder phah zawh tak leh khaw daia Breast Wall/ Retaining Wall lung rem leh Indoor Stadium sakna tur hmun te a enfiah bawk.

Khawtlang hruaitute a kawmnaah Champhai Bawrhsap hian NLUP leh Sorkar hmalakna dang hrang hranga an dinhmun te a sawipui a. Tun hnaia to ruahsur leh thlithleh vanga chhiatna tawhte a hmunah kalin a enfiah nghal bawk.

Champhai RD Block hnuaiah Vaikhawtlang Community Hall 2015-2016 BADP hnuai ami leh Khuangphah-a Community Hall vek BADP 2014-2015 hnuaia sak mekte chu DC hian a enfiah nghal a ni.

Champhai DC hi Ngopa SDO (C) leh BDO ni bawk Pu V. Lalruatliana , Champhai BDO Pi Zonuntluangi, PHED SE Pu Lalrammawia, Pu Victor Lalawmpuia, ASO(DC) leh Pi Emily Lalrinpuii, DIPRO ten an tawiawm a ni.

Attachment

  • Loading attachment...