1982/2023-2024

Dated Aizawl, the 22nd September, 2023: Vawiin khan Vanapa Hall-ah hmeichhiate venhim leh an dinhmun chawikan kawnga hnathawk tha chawimawina, Zakapa Award, 2023 hlanna inkhawm Social Welfare & Tribal Affairs Department ten an buatsaih chu Pu Zoramthanga, Chief Minister chuan khuallian niin a hmanpui a. Dr. R. Lalthangliana, Minister, Health & Family Welfare pawhin a telpui.

Thusawiin khuallian chuan, Zakapa Award buatsaih a ni hi a ropui ka ti a, Mizo hmeichhiate chhan tura engkim chan huam lal Zakapa hi zofaten hrerengin, huaisen takin a hnung hi i zui ang u. Mi tam tak ngaihah chuan chawimawi tlai kan ang mai thei, mahse tun hi Pathianin a hun tak atan min buatsaih sak niin ka hria. Tunah hian kan chhehvela kan zohnahthlak unauten 'chhanchhuah kan ngai e' tiin min au mek a. Mizoram lam rawn hawiin an rawn pan khawm a. Anni lo tuamhlawmin Kohhran, tlawmngaipawl leh mitin maiin theihtawp kan chhuah ho a ni. He kan tan hona, kan ram leh hnam hmangaihna hnathawh ropui tak avang hian sawrkar laipui pawh min pui turin a inhawng deuh deuh zel a ni. Zakapa khan dan lo angin bawrhsap kha a hnial a, mahse a ram leh a hnam a hmangaihna leh; a hnam dan a dinpui ngamna khan hnathawh ropui tak a nei zui ta zawk a nih kha. Keini pawhin he hnam chhan tur hian theihtawp kan chhuah zel ang a, hnam thinlung nghet tak puin, hnama min dintu Pathian hrerengin kan bei zel dawn a ni. Mizoram, a hnam, a ram leh a chhunga cheng hmeichhiate leh mipuite humhimin awm zel rawh se, a ti a ni.

Chief Minister hian lawmman; thuziak (Lehkhapui) leh pawisa fai Rs. 100000 (nuai khat) chu Dr. Lalrinawmi Ralte hnenah hian a hlan a ni.

Er. Lalrinawma, Minister, Social Welfare & Tribal Affairs Department, Zakapa Award Organising Committee Chairman ni bawk chuan khuhhawna thu a sawi a. Zakapa Award, 2023 a hlawhtlin theih nana thawktute zawng zawng chungah lawmthu sawiin, a thih hnu kum za leh sawmthumah hmeichhiate humhimtu lal ropui Zakapa hriatrengna leh chawimawina kan nei hi a hlu ka ti a. Tlai tawh hle angin lang mahse a hnathawh ropui tak avang khan a hming hi Pathianin a bo pil a phal lova, tunah ropui takin a lo vul leh ta a ni, a ti. Pu David R. Lalsawmtluanga, Member, Organising Committee chuan lal Zakapa'n kum 1891 kumtir lama South Lushai Hills Superintendent CS Murray-a'n Khawhri khuaa nula a phutna huaisen taka "kan hnam dan a ni lo" tia a lo hnial dan leh an indo zui dan chanchin tawi sawina a nei a ni. Zakapa hi Fanai lal Dokhama, Sailulak lal fapa niin 1839 ah a piang a ni.

Lawmman dawngtu tur an thlan dan leh a dawngtu Dr. Lalrinawmi Ralte chanchin tawi Pi Zoramthangi, Director, Women & Child Development leh Member Secretary, Organising Committee chuan a sawi a. Tehfung pawimawh tak tak sawm an neih thu a tarlang a, chu tehfung atang chuan a dawngtua an thlan tak Dr. Lalrinawmi, Tlangnuam hi a rawn lang fiah hle a ni, a ti. Dr. Lalrinawmi Ralte hian Mizoram pawn lama Mizo hmeichhia harsatna tawkte chhanchhuahna hna vawi tam tak a lo thawk tawh thin a ni.

Inkhawm kaihruaitu Pu KT Beicho, IRAS, Principal Secretary chuan kalkhawmte lawmna thu sawiin, Upa Prof. Lianzela'n hunserh hmang  a, official pawimawh leh sawm bik midangte an tel tha hle a ni.