1983/2023-2024

Aizawl, 22nd September 2023: Vawiin khan MLA General Election 2023 pualin Information & Public Relations Officer-te tan I&PR Auditorium-ah training buatsaih a ni a. Inthlanpui tluang taka neih a nih theih nan Media kaihhnawih thil hrang hrangte zirhona hun an hmang.

I&PRO Training hawnna inkhawm hi Dy. CEO leh State Training Co-ordinator Pu Henry C. Lalrawnkima chuan a kaihruai a. Keynote address sawitu Addl. Chief Electoral Officer Pu H. Lianzela chuan mipuiten an aiawha rorel tur an thlan theihna chu Democracy lungphum pawimawh tak a ni, a ti a. Inthlan langtlang leh thianghlim tak neih a nih theih nan India ram Danpui chuan Election Commission of India (ECI) chu zalenna leh thuneihna zau tak a pek thu a sawi. ECI chuan media-te chu a khuahkhirh lova, amaherawhchu dan leh thupek media-ten an zawm a ngai pawimawh a ni, a ti. Mipuite hrilhhriat leh tan bik nei lo a thu thehdarh chu sawrkar thupuangtute mawhphurhna pawimawh tak a ni tiin inthlan kaihhnawih dan hrang hrangte sawi hawnna hun a hmang a. Tunhnaia Mizoram rawn tlawhtu ECI hotute chuan inthlanna thianghlim, felfai, langtlang leh muanawm an ngaih pawimawh thu a sawi bawk.

Addl. CEO chuan kalkhawmte chu voter turnout a tam theih nan tan la theuh tura ngenin, Systematic Voters’ Education and Electoral Participation (SVEEP) hmalaknate theihtawp chhuahpui turin a sawm a. MLA General Election neih turah Polling Station za a 50% inthlan kalpui dan (election process) official-ten an lo enfiah theih nan ‘web-casting’ tih a ni dawn tih a tarlang bawk a ni.

Vawiin training-ah hian Mizoram District sawm leh pakhata IPRO te an tel a. State Level Master Trainer - Pi Dorothy Muansangi, Pu Victor Lalawmpuia leh Pi Zoramdini ten kalkhawmte hi inthlan kaihhnawih thupui hrang hrang an zirtir a. I&PR Dy. Director Pi Mina Zoliani chuan lawmthu sawiin, training hi a khar a ni.