1984/2023-2024

Aizawl, the 22nd September 2023: Vawiin khan National Service Scheme (NSS) Day vawi 54-na puala inkhawm Chanmari YMA Hall-ah nei a ni a. Sport Minister Pu Robert Romawia Royte chuan he hun hi a hmanpui.

Sports Minister Pu Robert Romawia Royte chuan NSS volunteer leh Programme Officer anga a thil tawn te a sawi a. Zirlai leh thalai tam tak, an thatlai leh vanglai huna NSS volunteer nih vanga PO te kaihhruaina hnuaia thil tha tih kawnga inhmang mekte chuan thil tha an ti tih a sawi a. P.O te pawh kan ram leh hnam tana ro hlu chherchhuaktu an nihna a thara hre turin a fuih. He hunah hian midangte tana thisen peknaah te, faina vawn leh Vantlang tana hna thawhna kawnga tan la zel turin Programmes Officer te leh volunteers kalkhawmte chu a chah a ni.

Social Media tangkaina leh a thatlohna te chiang takin a sawifiah a. Hlawhtling tur leh dingchhuak turin hun hman thiam a pawimawh thu te leh Ruihlo lak fihlim a pawimawh zia te pawh a sawi bawk a. Hmasawna rilru leh taksa hrisel nei turin taksa hrisel a pawimawhna te, midang te atanga idea tha nei leh mi changkang zawk te atang thil tha zawk zir tura han zinchhuah ve thin te a tul thu a sawi bawk.

He hunah hian Pu F.Sangvuana, State NSS Officer & Dy Secretary, NSS Cell, Mizoram hnen atangin report ngaihthlak a ni a. NSS Day September ni 24 chu Pathianni a nih avangin September ni 22-a hman a nih zawk thu te, NSS Volunteer ten a thlawna thisen pekah hma an hruai thin thu te, kum 2020 leh 2021-a Covid hripui leng avanga zirna in khar a nih avanga thisen pekah pawh tlahniamin pahnihna dinhmun a lo hauh tawh thu te; kum 2018 leh 2019-ah te chuan a thlawna thisen pe hnem ber dinhmunah a lo din tawh thu leh kum 2022-ah phei chuan thisen unit 6093 pein thisen pe tam ber a nih thu te a sawi.

NSS Day puala program-ah hian volunteer ten thisen a thlawna pekah hmahruaitu an nih zel theih nan Sports Minister's Trophy for Voluntary Blood Donation chu College pathum - Pachhunga University College, Govt Hrangbana College leh Govt Aizawl College te hnenah leh Higher Secondary School pathum - Synod HSS, Govt Zemabawk HSS leh Helen Lowry HSS te hnenah khuallian hian a hlan a ni. Pu Robert Romawia Royte hian NSS Annual Achievement Report 2022-2023 a tlangzarh nghal bawk.

Program hi Prof Benjamin L. Saitluanga, Programme Coordinator, NSS Cell, MZU-in inlawmna thu sawiin tan a ni a. Report ngaihthlak niin he hunah hian Pu Lalnunhlua, Director, Sports & Youth Services Department pawhin NSS volunteer te tan fuihna thu a sawi bawk a ni.

NSS Day hi Mizoram puma NSS dinna Institution hrang hrangah anmahni Institution leh vantlang hmun thian faiin leh damlo te tana thisen pein hun hman a ni. Tunah hian Mizoram pumah NSS Unit awmna School leh College 101 lai a awm a ni.