1985/2023-2024

Champhai the 22nd September, 2023 - Cheng nuai 262 senga sak, Champhai District Transport Office Building thar chu vawiin khan Transport Minister Pu TJ Lalnuntluanga chuan a hawng a, Dr. ZR Thiamsanga, Health & Family Welfare Board Vice Chairman chu he hunah hia. khualzahawm a ni.

Khuallian Transport Minister Pu TJ Lalnuntluanga chuan thusawiin Transport Department hi mipui hne hnai tak Department a nih angin hmunhma tha tak neih a ngai tih a sawi a, building thar sak phal saktu Chief Minister Pu Zoramthanga chungah  lawmthu a sawi a, Champhai District ah Transport Department Office Building tha tak sak hlawhtlin a nih theihna tura hmala tu zawng zawngte chungah lawmthu sawiin hun rei lote chhunga tha tak ni si a, sak zawh a ni chu lawmawm a tih thu a sawi bawk.

Pu TJ Lalnuntluanga chuan Champhai Officer te tanrualna leh thawhhona tha tak awm thin chu ropui a tih thu sawiin chu thawhhona tha tak avang chuan Champhai ah hmasawnna hrang hrang hmuh tur a awm tawh tih a sawi a, Transport Department Building thar pawh Officer te inlungrualna vanga ding thei a nih thu a sawi bawk. Transport Department chu Covid lai pawhin hna an thawk tha hle tih sawiin an chungah lawmthu a sawi a, an thawhrimna zarah Mizoram ah Transport lamah nasa takin hmasawnna a awm thu a sawi a ni.

Transport Minister chuan public transport a chuang zinga nu nau chak lo zawkte chungah hleilenna a thlen lohna tur leh an lo him theihna turin lirthei ah Panic Button dah a nih tur thu a sawi a, Champhai ah pawh kalpui vat a ni dawn tih a sawi. Lirthei chhiah a hun a pe thei lote tan a pung awm lovin tum 2 kalpui a nih tawh thu a sawi a, tunah pawh December ni 31 thleng a pung awm lovin lirthei thi tawh tihnunna hun hawn a nih mek thu a sawi. Life time tax tidanglam tura an lo tlangaupui tawh angin thlan tlin an nih atangin tihdanglam a nih tawh thu a sawi. Lirthei dah tawl mai mai tawh te, chhiah pek theih tawh si loh thenfai hna pawh thawh mek niin engemaw chen chinfel a ni tawh tih a sawi a, E- Chalan System pawh kalpui mek a nih thu a sawi. Pickup Camper Commercial Vehicle a registration tih ngai thin chu private a hmang duh tan pawh private a registration tih theih a nih tawh thu a sawi a, hei hi a hlawhtlin theihna chhan chu finchhuahtu an awm vang tih a sawi a, finchhuah zel an ngai tih sawiin fiahchhuah hreh lo turin kalkhawm te a sawm a ni.

Khualzahawm Dr. ZR Thiamsanga Health & Family Welfare Board Vice Chairman pawhin thusawiin Covid-19 leng vangin kan ram economy pawhin a tuar hle tih a sawi a, India ram ah mi nuaih telin an thihpui tih a sawi a, sawrkar leh mipuite thawhhona azarah tunah chuan dinhmun ziaawm taka kan awm leh tawh tih a sawi a, mi tam takin Covid-19 hri leng kha chhuanlam a tling lo ti thin mahse vawiin thlenga nghawng ala neih danah chhuanlam a tling takzet tih sawiin kan ram chauh ni lo, ram changkang leh hausa te pawh tun thlenga an economy thlakchhiat phah pawh an awm tih a sawi.Ram ri buaina chungchangah Mizoram mipuite leh sawrkar thawhhona thatak kha ropui a tih thu leh theihnghilh theih a ni tawh dawn lo tih a sawi a, ram tana silai hmetpuak ngam Mizoram sipai te chhuanawm a tih thu a sawi a, tunah chuan Police outpost pawh a hmaa Assam sipai ten an thiahna atanga hla tawk tak ah sak a ni tawh a, tihbuai an nih tawh loh thu a sawi a.

Dr. ZR Thiamsanga chuan ramri buaina chinfel a nih hnu lawk ah thenawm ram buaina avangin kan ramah raltlan tam tak an awm tih a sawi a, chu chuan kawng tam takah a tibuai tih sawiin damdawi leh an mamawh tur hrang hrang te pawh thawn thin a nih thu a sawi a, anni lo buaipui na turin Central sawrkarin sum engmah a pe lova, Mizoram sawrkar in a tum vek tih a sawi a, a tawo tawh dawn emaw tih laiin Manipur Zofaten buaina an tawk leh a, kan ensan thei lo tiin damdawi thahnem tak an thawn leh thu a sawi a, nuaih tam tak man pek an nih thu a sawi.

District Transport Office thar hawnna inkhawm hi Pu T. Lalrammawia, Director Transport Department chuan kaihruaiin, Pu Zothangzuala, Chhangte, Joint Director Transport Department chuan kalkhawmte lawmna thu sawiin Transport Department kalphung leh a lo dinchhuah dan te, a chhunga hnathawh a nih dan leh Deparment hrang hranga an inthen dan leh hna an thawhdan tlangpui a tarlang a, Er. Lalremruata, Sr. Executive Engineer PWD hnen atangin Champhai District Transport Office building thar sakna tura inbuatsaihna leh buikding sak chungchanga hriat tul pawimawh te ngaihthlak niin Dr. Manesia Khaimeichho, DTO chuan lawmthu sawiin hun a khar a ni.

District Transport Office Building thar hi cheng nuaih 262 senga sak niin kum 2022, July thla khan hna thawh tan a ni a, sak zawh hun atan kum 2024 January thla chu ruat ni mahse hun tiam thlen hma thla 3 vel ah sak zawh hman a ni. Contractor hi Pu HS Lalfakzuala niin building hi a basement sqm 186.54 a zau a sak a ni a, a hnuai ground floor hi sqm 206 a zaua sak a ni.