1986/2023-2024

Aizawl, 22nd September 2023: Vawiin chawhma khan International Day of Sign Languages pualin Gilead Special School(GSS), Bawngkawn Brigade, Aizawl-ah Spastic Society of Mizoram chuan Programme a buatsaih a. He hunah hian Governor Dr Hari Babu Kambhampati leh Lady Governor Dr Jayashree Kambhampati te pawh an tel a ni. Kumin hian Zaizira Inbiakna puala ni bikah hian thupui atan - “Bengngawngte’n khawi hmunah pawh harsatna nei lova zaizira an duh zawng te an sawi theihna Khawvel!”, tih hman a ni.

Governor Dr Hari Babu Kambhampati chuan ‘International Day of Sign Languages’ pual hian Mizoram hmun hrang hranga Pian phunga rual banlo te leh an nu leh pate zawng zawng duhsakna chibai a buk hmasa a. Kut zaizira inbiak pawh theih chu thil pawimawh tak a ni a, beng tha lo leh tawng harsat te tan chauh a ni lo a. Hnam hrang hrangte tawng inhriatsak lem loh te pawhin inbiakna atana an hman theih leh inpumkhatna atan hmanraw tha tak a ni a ti.

Governor chuan sawrkar hmalakna leh Spastic Society of Mizoram thawhrimna leh inpekna avangin hetiang Zirna School danglam bik, Gilead Special School Mizoramah kum 30 chuang hlawhtling takin a lo kal chu ropui a tih thu a sawi a. He school-ah hian Vocational Training Center leh Skill Development wing kaltlangin zirlaite hnenah thiamthil an zirtir chu tha an tih thu a sawi a. He school atanga zirchhuak tate zingah themthiamna lam puanthui, carpentry leh eizawnna dangah te mi hlawhtling tak tak an awm chho zel chu hlawhtlinna ropui tak a ni a ti.

Gilead Special School hlawhtlinna kawnga theihtawp chhuahtute leh tuna he school enkawltute zawng zawng chu phurna thar nen, tan la chhunzawm zel turin a fuih a. He school pawimawh tak, vohbik naupangte puala zirna leh thiamthil kawhhmuhna hmun hian hma a sawn zel theih nan Governor anga a tih theih te chu tih zel a tum tih a sawi bawk.

A thusawi zawhah Governor Dr Hari Babu Kambhampati chuan Spastic Society of MizoramInstagram Account leh YouTube Channel a tlangzarh nghal a. He social media account te hi mipui inzirtirna atan te, state chhung hmun danga vohbik naupang nu leh pate tan thil tangkai tur inkawhhmuh na atan te a siam a ni.

Full Speech of Governor: dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-international-day-of-sign-languages-at-gilead-special-school-bawngkawn-on-22nd-september-2023

International Day of Sign Languages puala Program buatsaih hi Pi Chhingpuii, Chairperson, Spastic Society of Mizoram-in a kaihruai a. GSS aiawhin Prof Margaret Ch Zama, Director of Services, GSS chuan School chanchin leh hlawhtlinna langsar zual deuh te  report a pe a. Vice Chairperson Pi Zokhumi  chuan lawmthu sawiin huntawp a khar thung. Program pangai neih zawhah Governor leh Lady Governor te chuan  classroom zawng zawng tlawh chhuakin  zirlai leh an zirtirtu te an kawm bawk a ni.