1987/2023-2024

Aizawl the 22nd September, 2023: Vawiin chawhnu dar 3 khan Pu Lalchamliana, Home Minister zahawm tak chuan Mizoram Police Sports Meet vawi 21-na kharna (Closing Ceremony) Rajiv Gandhi Stadium, Mualpui, Aizawl-a hman chu khuallian niin a hmanpui.

Pu Lalchamliana chuan thu sawiin Infiamna hian kan taksa hriselna mai bakah police te inkarah inunauna, inhmelhriatna tha, inlaichinna tha, inhriatthiamna leh thawhhona tha a awm theih nana sports chu neih zel a nih theih nan duhsakna a hlan a. Hripui leng avanga sorkar sum dinhmun chhiat avangin recruitment tih hleihtheih a ni lo chu pawi a tih thu a sawi a. Chuti chung chuan tuna Composonate ground-a lut mi engmaw zat police training centre-ah an training mek a ni. Khuallian chuan "All India level-ah Infiamna hrang hrangah a langsar pawl inni hi a lawmawm takzet a, 71st BN Mullick Memorial Football championship Srinagar-ah pawh Mizoram Police team te in-champion thei hi ka chhuang takzet che u a ni," a ti a, Mahni chauha kan awm lai pawhin keimahni invawng tha a, discipline tha tak nei reng turin kalkhawmte a chah a ni.

Mizoram Police Infiammite intawhkhawm 2023 hi September ni 18 atang khan tan tawh niin infiamna hrang hrang intlansiak, badminton, etc-ah te inelna buatsaih a ni a, Police infiammi thahnem tak an tel a ni.

Pu Anil Shukla, IPS, Director General of Police, Mizoram chuan infiammi zawng zawngte chungah lawmthu a sawi a, an hriselna leh an nun uluk taka enkawla ruihtheihthil lak ata fihlim turin a chah a. Mizoram Police hmel innih angin mahni inthununna (Discipline) tha tak nen Mizoram mipui venghimtu an ni tih chu hrereng turin Mizoram Police-te a chah a ni.

Tunah hian Mizoram Police a hian DGP hovin Addl. DGP Pakhat, IGP pathum, DIG pasarih bakah Indian Police Service (IPS) leh Mizoram Police Service (MPS) Officer fel tak tak te'n Mizoram Police te hi an kaihruai mek a ni.

Mizoram Police Sports Meet 2023-ah hian Contingent 12 a inthenin sports discipline hrang hrang football, volleyball, basketball, Badminton, Tug of war, Tennis, Table Tennis, Boxing, Judo, Shooting, Chess, Carrom, Chinese Checker, taekwondo, leh Athletics-ah an inel a, Gold Medal 18 lain Overall Champion chu Central Range Contingent te an ni a, pahnihna chu PHQ group niin pathumna chu Red Group te an ni. XXI Mizoram Police Sports Meet- 2023 theme chu 'Unity Through Sports' (Inpumkhatna Tura Infiamna) tih a ni a, infiammi 1107 an tel a ni.

Meet kharna inkhawmah hian Mizoram Police Unity Band te’n Mizoram Police Anthem mawi takin an tum bawk a ni.