1988/2023-2024

Aizawl, the 22nd September, 2023: Mizoram Sawrkar Environment, Forest & Climate Change (EF&CC) Department hnuaia Champhai Forest Division-a Nature Learning Cenre (NLC) kalpui chhoh mek hnuaia hmalakna pakhat, Nature Learning Tour kaltlanga Sikkim State-a nungchi hrang hrangte enkawlna, humhalhna leh zirchianna hmunte bakah ram leilung hausakna humhalh kawnga hmalaknate zirchiang tura Sikkim-a cham mek Nature Learning Press Study Tour Team, Undivided Champhai District chhunga Mizoram Journalists' Association Member 9 leh Information & Public Relations Department Official mi 3 te chuan vawiin khan Sikkim Himalayan Zoological Park, GB Pant National Institute of Himalayan Environment & Sustainable Development leh Fambonglho Wildlife Sanctuary-te tlawhin hmalaknate an zirchiang.

Sikkim Himalayan Zoological Park, Bulbuley tlawhnaah hian Director Pu Sangay G.Bhutia leh DFO Pi Shivani Pradhan te'n Nature Learning Press Study Tour-a kalte hi an lo dawngsawng a, Himalayan Zoological Park chu kum 1997 a din, India rama sahuan zau berte zinga mi hectare 230 a zau, hmun sang taka awm a nih thu an sawi a. Ramsa chi 17 leh Sava hrang hrangte an kawl mek thu an tarlang a. Ramsa neih dan leh enkawl dante bakah Sikkim Sawrkar Environment, Forest & Climate Change Department hmalakna dangte an hnen atanga ngaihthlak a ni a. Gangtok ang thova hmun sang taka awm Champhaia Satellite Wildlife Rescue Centre dinna tura pawimawh leh tul angte pawh sawiho a ni bawk.

Hemi hnu hian GB Pant National Institute of Himalayan Environment & Sustainable Development, Sikkim Regional Centre, Pangthang tlawhin Dr. Sandeep Rawat, Scientist leh a thawhpuite'n an lo dawngsawng a. Hmunhma Acre 17 a zauah Himalayan tlang leh a chhehvela nungchi hrang hrangte lakkhawma zirchianna, humhalhna, tihpun leh sum chang thei tura hmalakna awmze nei taka kalpui a nih dante bakah leilung hausakna humhalh leh hman tangkai kawnga hmalaknate tarlangin, GB Pant National Institute of Himalayan Environment & Sustainable Development hnuaiah thupui bik hawi project 4 kalpui a nih dante leh kum 2019 atanga an kalpui Nature Learning Centre hnuaia hmalak dante a sawifiah a. MJA member-te chuan Champhaia Nature Learning Centre kalpui chhoh mek a nih dante tarlangin, thawktute chu Champhai tlawha an tawnhriatte hmanga hmalak dun puiah an sawm a ni.

Hemi hnu hian Nature Learning Press Study Tour Team chuan kum 1984 a din square kilometre 51.76 a zau Fambonglho Wildlife Sanctuary an tlawh a, Block Officer Pu N.Lepcha leh a thawhpuite'n lo dawngsawngin hmalak dante an lo hrilhfiah a, inkawmhona hun hman zui a ni bawk.

Nature Learning Press Study Tour Team hi Dr. Lallawmkima, IPRO chuan a hova, nimin lamah ICAR- National Research Centre for Orchids (ICAR-NRCO), Pakyong, Sikkim an tlawh tawh bawk a ni.

EF&CC Department hnuaia Nature Learning Study Tour kaltlanga zin chhuakte hian Sikkim State chhunga Sawrkar laipui leh State Sawrkar hmalak dante an zir a. Mizoram Sawrkar Environment, Forest & Climate Change Department kaltlanga Champhaia Nature Learning Centre, Botanical Garden, Satellite Wildlife Rescue Centre leh Nagar Van kalpui kawnga tulte leh pawimawh nia an hriatte zirchiang tura beisei an ni.