1989/2023-2024

Dated Aizawl, the 22nd September, 2023: Vawiin khan Labour, Employment, Skill Development & Entreprenuership Department (LESDE) leh Ministry of Skill Development & Entreprenuership, (MSDE) Government of India te tangkawpin an buatsaih 3rd Mizoram Innovation Competition & Exhibition Fair - PUM, 2023 kharna inkhawm, Industrial Training Institute, Aizawl a buatsaih chu Chief Minister Pu Zoramthanga chuan khuallian niin a hmanpui a, Pu Lalchhandama Ralte, Minister, LESDE chu khualzahawm a ni.

Chief Minister hian stall hrang hrangte a tlawh kual hmasa a, chumi hnuah a kharna inkhawm hi ITI tualah hman zui a ni. He hunah hian thusawiin PUM 2023 kharnaa tel ve chu a manhla hle mai, tunhma chuan Pùmah hian hna ka lo thawk ve tawh thin. Vawiinah kan thalaite thil siam chhuah tha tak takte han hmuh hian a tuiawmin chhuanawm ka ti hle a ni, a ti. LESDE hmasawnna hi ka hmuhpuia, an building leh hmunhmaten Covid hripui karah pawh heti taka hma a sawn hi a chhuanawm em em a ni. An peng pawimawh tak Youth Commission pawh hi thalaiten an mamawhzia hre chunga hmathlir thui tak neia kan din a ni nghe nghe. Lehkha kan zir ve laia zirbu tha kan neih lohziate ngaihtuah chuan tuna kan thalaiten Youth Commission an han nei hi an nihlawh hlein ka hria a ni. Hmathlir thui tak neiin Mizoram Secretariat chu Assam Rifle hote awmna hmun ni thin Khatla lamah kan suanchhuak tawh a, chutiang zelin Millenium Centre lo din dante leh thildang tam tak sawi tur kan nei. Hmathlir dik nei chunga hma kan lakna rah zel a ni. Tun tum sawrkarah erawh chuan Covid19 hripui vangin kan beisei angin hna kan thawk thei ta lova, hripui tihbuai loh hian kum nga vel han thawk thei ila chuan nasa takin hma kan sawn dawn tih a chiang hle a ni, tiin hmathlir tha leh dik nei chunga hmalak a pawimawh dante a tarlang a. Vawiina a bul kan tan mek PUM zarah hian Industry lian zawk an lo la chhuak ngei dawn a, ngaihtuahna thar nei chunga hna lo thawk zel turin ka chah che u a ni, a ti.

Khualzahawm Pu Lalchhandama Ralte pawhin thusawiin, PUM bakah hian ITI zirlaite tan tho 'Kawtchhuah' pawh an buatsaih thin thu a tarlang a, tun hma chuan LESDE Department chu mite hriat hlawh lutuk lo a ni thin a, tunah chuan Mizoram sawrkar hmalakna zarah thalaite in pui, thalaite rahbi tuk hna thawktu department pawimawh leh thangduang ber a ni chho mek a, hun rei tak mi in luaha kan awm hnuin kumin July ni 7 khan Directorate Building tha tak MINECO ah kan hawng ta hial a ni, a ti a. Mizoram sawrkarin thalaite hmakhua a ngaihtuah vanga hetiang dinhmun thleng thei hi kan ni, a ti bawk.

He hunah hian Pu Lalramsanga Sailo, Secretary, LESDE Department chuan kalkhawmte lawmna thu a sawiin tluang taka PUM 2023 an hman theih avang leh Chief Ministerin a kharna a hmanpui theih avangin lawmthu a sawi a ni.

Pi Angela Zothanpuii, Director, LESDE chuan he Fair an buatsaih dan tlangpui a sawifiah a. Kuminah hian competitors 64 an awm a, an zinga mi 9 te hi ITI zir mek an ni a, 11 te hi ITI zirchhuak tawh an ni. Inelna hi Engineering leh Non- Engineering huanga then niin, Engineering huangah hian mi 28 an inela, non- engineering ah hian mi 39 an tel a ni. Exhibition a nih tel avangin sawm bik stall hawng tur mi 8 te nen a vaiin Stall 78 a awm a ni.

Lawmman dawngtute chu:

Engineering Category ah Pakhatna - Malsawmna Blackwire, Tuithiang, Blackwire siamna khawl. Pahnihna J. Lalremtluanga, Lungleng I, Wireless Water Pump Controller siamtu. Pathumna F. Lalnunfela, Zemabawk Vengthar, Waste Oil Thuk siamtu.

Non- Engineering Category lawmman dawngtute chu, pakhatna Bamboo Tea siamtu Lalmalsawma, Ramthar Veng, Aizawl. Pahnihna Kane Vanlalhriatpuia, Republic Vengthlang, Eco Board siamtu leh pathumna State Visual Documentation & Production, College Veng, Aizawl te an ni a, lawmman te hi Chief Minister-in a hlan a ni.

Lawmman dang an buatsaih leh a dawngtute chu hetiang hi an ni:

ITI Achiever Award : Pu Lalzamliana Sailo, Fancy Electronics

Best ITI Students Award: Albert Lalrindfela, Electrical Accident Protector siamtu

People's Choice Award (Engineering Category) : COPA 2023-24 Batch, ITI, Aizawl, Software Web Application siamtute.

Peoples' Choice Award (Non - Engineering Category) : V&B Epoxy & Wood Turning, Mission Vengthlang, Aizawl.

Best Innovator Award (mi pahnihin an dawnga) : Pu Lalhruaitluanga, New Serchhip, Bazar, Animal Feed Cutter siamtu leh J. Lalremthanga, Lungleng I, Wireless Water Pump Controller siamtute an ni.

Chief Minister hi Pu K. Laldawngliana, MLA, Vice Chairman, Commerce & Industrial Development Board chuan a tawiawm a ni.

PUM 2023 hi Skills Strengthening for Industrial Value Enhancement (STRIVE) leh Atal Incubation Centre - SELCO Foundation (AICSF) sum hmanga buatsaih a ni a, a kharna thusawi Pu K. Lalhmingliana, Addl. Secy, LESDE chuan a nei a ni.