1990/2023-2024

2023 Mimkut thla ni 22: Vawiin khan Govt TS Luaia Middle School, Rengtekawn, Kolasib te'n an kum 25 tlin, Silver Jubilee lawmna hun an buatsaih chu Food, Civil Supplies & Consumer Affairs Minister Pu K. Lalrinliana chuan Khuallian niin a hmanpui a. Serlui bialtu MLA, Rubber & Allied Crops Vice Chairman Pu Lalrinsanga Ralte chu khual zahawm a ni.

Minister Pu K. Lalrinliana chuan Silver Jubilee hriat rengna lungphun hawngin, Govt TS Luaia Middle School-in Silver Jubilee an thleng chu a lawmpui tak zet tih a sawi a. School bul tumtu (donor), fam ta Pu TS Luaia chu Kolasib mi ropui zinga mi a nih thu sawiin, tun dinhmun hi rawn hmuh ve se a lawm hlea a rin thu a sawi a. School bul ṭan tirh laiin a hmun chu ngawpui hnuai a nih avangin naupang sikul kal tur an awm lo mai ang tih a hlauhthawnawm thu te, School pan chhohna pawh bumboh tak a nih thu te sawiin, zirtirtute leh khawtlang hruaitute leh tlawmngai pawl te inpekna avangin tun dinhmun hi an thleng a ni a ti a; amah pawh School bul ṭantute zinga mi a nih angin an ṭhahnem ngaihna leh an thawh rimna pawh a hriatpui thu a sawi. Sawrkarin zirna lamah nasa takin ṭan a la a, sum leh pai harsatna karah pawh a theih ang anga ṭhain zirna in te enkawlna kawngah pawh hma a la tih a sawi a. Zirtirtute leh khawtlang hruaitute chu zirlai ṭha tak tak chher chhuak zel tur leh ṭhahnem ngai taka School enkawl zel tura chahin, duhsakna a hlan a. School-in ṭul leh mamawh an neihte phuhruk nan sum eng emaw zat a pe bawk a ni.

He huna khual zahawm, Pu Lalrinsanga Ralte pawhin thu sawiin, Govt TS Luaia Middle School bul tumtute hma lakna chu fakawm a tih thu a sawi a. School-in Silver Jubilee a thlen theihna chu zirtirtute vang a ni tiin, zirtirtute kutah naupangte hmakhua a innghat thui hle tih a sawi a. Naupangte'n aia upa zahna leh nun kawng ṭha an zirna leh rinna kawnga anmahni kaihruaitu chu zirtirtute an ni tiin, zirtirtute chu ṭhahnem ngai taka an mawhphurhna hlen chhuah tum turin a chah a ni.

Silver Jubilee lawmna hunah hian School zirtirtute leh zirlaite bakah, sawrkar official-te, khawtlang hruaitute, tlawmngai pawl hruaitute leh sawm bik mi ṭhahnem tak an tel a. School Managing Board Chairman Pu Ngamlalthova'n hun kaihruaiin, Headmaster Pu R. Lalzokima'n report a pe a. Zai leh recitation ngaihthlak niin, School naupangte'n Cheraw leh Siktuithiang lam an entir a. Jubilee hriat reng nan Minister chuan thing a phun bawk a. Programme hman zawhah Silver Jubilee lawmna ruai kil ho a ni bawk.

Govt TS Luaia Middle School hi January ni 15, 1996-a din a ni a. Silver jubilee chu COVID-19 hrileng avangin a hun taka lawm thei lovin, tunah hian lawm a ni ta a ni. School hian zirna piah lamah Faina Hapta inelnaah ṭum 7 pakhatna dinhmun hauhvin, pahnihna leh pathumna pawh ṭum eng emaw zat an lo la tawh a. Tun dinhmunah Headmaster leh thawktu pakua awm mekin, zirlai naupang 116 an awm mek a ni.