1991/2023-2024

Aizawl, 23.09.23: Department of Tourism leh Mizoram Cycling Association tangkawpin a buatsaih Tour de Hmuifang 3rd Edition chu tukin khan Vanapa Hall kawt atangin Tourism Minister Pu Robert Romawia Royte chuan a vailiam. Tourism Development Board Vice Chairman Pu TC Pachhunga pawh he hunah hian a tel a ni.

Minister hian thu sawiin, Tour de Hmuifang chu ngaihven a hlawh telh telh chu a lawmawm thu leh kumtin a thil thleng (annual event) a ngaih theih a nih tak thu a sawi a. A tel zingah hmeichhia an awm chu lawmawm a tih thu a sawi bawk a. Pu Robert Romawia Royte chuan Mizoram Cycling Association chu Mizoram Sports Association hnuaiah ziahluh a nih tawh thu leh Cycling Federation of India nena inzawmna (affliation) beisei mek a nih thu a sawi bawk.

Tun tum Tour de Hmuifang ah hian tel tura inziaklut mi 60 chuang an awm a, state pawn atanga lo tel mi 2 (Uttarakhand leh Manipur atangin) an awm bawk. Category chi hrang hrang - Junior, Masters, Elite, Open leh Women's category siam niin, an category a zirin Aizawl atanga Hmuifang an panna kawng pawh a danglam hlawm a. He thirsakawr khalh a intlansiakna buatsaihna ah hian AMC, AB-PMJAY leh Ministry of Tourism Regional Office te thawhpui an ni bawk.